Meeqqat inuusuttuaqqallu angerlarsimaffii kommunet 2009-mi tigussaneraat suli qulakkiivinneqanngilaq

- Aaqqissuussinermut ataatsimiititaliap innersuussutaasa ilagivaat meeqqanut inuusuttunullu ulloq unnuarlu paaqqinnittarfinnut tunngassuteqartut kommuninut nuunneqarsinnaanerat. Tassa massakkut qulaajagassat assigiinngitsut qulaajarlugit aallartinneqarput, tassaniipporlu aallaavippiaq massakkut suliat aallartinnerinut, Søren Alaufesen nassuiaavoq.

Imaappa kommunit tassa januaarip aallaqqaataani 2009-mi tigusissasut?

- Oqaatigissavarput politikkikkut annerusumik maannamut isumaqatigiissuteqartoqarnikuunngimmat aamma suli qulaajagassat qulaajarneqarnikuunngimmata. Aamma eqqaamassavarput ikaarsaariarnermi ataatsimiititaliap aallajangiiffigisussaammagit qanorpiaq kommunerujussuit inissisimassanersut, KANUKOKA-p siulittaasua oqarpoq.

Soormiuna kommunit suli tusarniarneqanngitsut?

- Aatsaat suliassat aallartipput aamma tupinnanngilaq kommunit suli tusarniaaffigineqaratik oqassappata. Aalajangertoqanngilaq pinngitsoorani januaarip aallaaqqaataani 2009-mi tiguneqassasut, nangippoq.

Aatsaat suliassat qulaajarneqarlutik aallartilerput. Qulaajaanerillu naammassippata kommuninut saqqummiunneqassapput. Taamaattumik Søren Alaufesen isumaqarpoq kommunit ernumalereertariaqanngitsut.

- Ernumassuteqartoqartariaqanngilaq, aamma tupinnassagaluarpoq kommunit avaqqutiinnarlugit suliassaasa qanoq ittuunissaat, ilisimatinnagit isumaqatigiissuteqarsimagaluarutta.

KANUKOKA-mi siulittaasoq Søren Alaufesen taama oqarnermigut Ilaqutariinnermut Pisortaqarfiup nittartakkamini allagai, KANUKOKA-p Namminersornerullutillu Oqartussat januaarip aallaqqaataa 2009-miit meeqqanut inuusuttunullu angerlarsimaffiit kommuninit tiguneqarnissaat isumaqatigiissutigisimasaanik imaqartoq eqqunnginnerarpaa. Suli piffissaliisoqanngitsoq unnerlugu.

Kommuneqarfiit Kattuffiata kommunerujussuarnut ikaarsaannginnermi suliassaqarfiit pillugit qaqugukkut suna sammineqassanersoq piffissalersoqqammerpaat.