Meeqqat inuusuttuaqqallu angerlarsimaffii kommunenit akisussaaffigineqalissapput
Ilaqutariinnermut pisortaqarfimmi immikkoortortaqarfimmi pisortaq, Gitte Jul ulluni makkunani aallarnisaallutik ullumi ataatsimeeqattaarput.
Meeqqat qangaanerusoq iliarsororsimatillutik assigisaanilluunniit nalaataqarnitik pissutigalugit meeqqat inuusuttuaqqallu angerlarsimaffiinut inissinneqartarnikuupput.
Ukiunili kingulliunerusuni takussaaleraluttuinnarpoq, meeqqat inuusuttuaqqallu ajornartorsiuteqaqisut meeqqat inuusuttuaqqallu angerlarsimaffiinut inissinneqartartut, taakkualu immikkut ittunik sullinneqarnissaminnik pisariaqartitsisartut.
Ukiullu ingerlanerini pissutsit allanngorarneri ilutigalugit, meeqqat inuusuttullu angerlarsimaffii suleriaatsinik allanngorartitsisarput, assigiinngitsunillu ajornartorsiutinik aporfeqartarlutik, Gitte Jul, ilaqutariinnermut pisortaqarfimmi immikkoortortaqarfimmi pisortaq oqarpoq.
Meeqqat inuusuttullu angerlarsimaffiisa 2009-mi kommunenit tiguneqarnissaat eqqarsaatigalugu, maanna suleqatigiissitaliassat kikkunnik inuttaqassanersut piareersarneqaleruttorpoq.
- Suleqatigiissitaliat perorsaanermut, ingerlatseriaatsinut, aningaasaqarnermut imaluunniit sullissinermut tunngasunik ilisimasalinnik inuttaqassapput, suleqatigiissitallu ajornartorsiutaasinnaasunik aporfissaasinnaasunillu allanik eqqartuisassapput, pigaaruteqarporlu suleqatigiissitani ilaasortat tamarmik meeqqat inuusuttuaqqallu angerlasimaffiini pissutsinik attuumassuteqartunillu allanik ilisimasaqarluartuussallutik. Taakkualu saniatigut suleqatigiissitaliat aamma KANUKOKA-meersunit ilaqutariinnermullu pisortaqarfimmeersunit inuttaqartinneqassapput. Gitte Jul oqarpoq.
Innarluutillit angerlarsimaffiisa kommunenit akisussaaffigineqalernissaat ukioq 2010-mi pisussatut naatsorsuutigineqartoq.
