Meeqqat Inuunerissut suliniutinut isumalluarput

Tamannali iluatsissappat qitiusumik sullissivissamik pilersitsisoqartariaqarsoraat.

- Naalakkersuisoq suliniutinik ingerlaannartumik aallartitsimmat iluaraarput. Suliassarli iluatsissappat ataqatigiissaarilluartoqartariaqassaaq suliassallu suuneri eqqummaariffigineqartariaqassallutik. Immikkut ilisimasallit uagut aaqqissukkatsinnik septembarimi ataatsimeersuartinneqarmata tamanna innersuussutigineqarpoq, Line Frederiksen, Meeqqat Inuunerissut siulittaasuat oqarpoq.

Illu meeqqanut sullissivissaq 6 millionit koruuninik aappaagumut inatsisissatut siunnersuummi aningaasaliiffigineqartoq takuneqarsinnaavoq, tamannalu aallarniutaalluarsinnaasoq, Meeqqat Inuunerissut sinnerlugit Line Frederiksen oqarpoq.

Sullissivissamik pilersaarut imaaliallaannarlugu naammassineqarsinnanngilaq, atornerlunneqarsimasulli katsorsarneqarsinnaalereersut, Line Frederiksen oqarpoq:

- Katsorsaasoqarsinnaalereerpoq, suliamilli ataqatigiissaarilluarnissaq pingaaruteqarpoq. Taamaaliornitsigut sullissineq pitsanngorsartuarsinnaassavarput, Line Frederiksen, Meeqqat Inuunerissut siulittaasuat oqarpoq.