Meeqqat Inuunerissut suleqatigiinnermit tunuarput
Namminersornerullutik Oqartussat suleqatiginnikkusussuseqanngitsutut, soqutiginninngitsutut aalajangiisinnaasuseqanngitsutullu nalilerlugit suliniaqatigiiffik "Meeqqat Inuunerissut" suleqatigiinnermit tunuarput.
Allattoq Jaaku Lyberth
Naalakkersuisoqarfinnit ataatsimiigiartitat piareersarsimaneq ajornerat, siulianilu ataatsimiinnermi aalajangikkat qaqutiguinnaq ingerlateqqinneqartarnerat, suliniaqatigiiffiup Meeqqat Inuunerissut suleqatigiinnermit tunuarnerminit tunngavilersuutigai.
Suleqatigiissitaq pilersinneqarmat Namminersornerullutik Oqartussanit ataatsimeersuartoqarnissaanik aaqqissuussinissamik suleqatiserineqarpoq.
Qaammatit tallimangajaat qaangiutereersullu ataatsimeersuarnerup suli piviusunngortinneqannginnera suliniaqatigiiffiup ajuusaarutigalugu suleqatigiinnermit tunuanerminut tunngavilersuutigaa.