"Meeqqat inuunerissut" politikerinut eqeersaavoq
Ilaqutariinnermut Pisortaqarfiup ullumi aamma nalunaarutigaa, meeqqat inuusuttullu pillugit suliniutit siorna aallartinnneqartut naammasiartorneqalersut iluatsilluartut. Taamali nalunaaruteqarneq naammagineqanngilaq.
Nuummi ingerlaaqatigiit meeraaqqaniit utoqqarnut 1.000-t missaanniittut peqataapput. Suliniaqatigiit Nuummi aqqaniliusut ilaat Aviaaja Heilmann siunertartik pillugu ima oqarpoq.
- Tassa siunertaraarput meeqqat siunissami inuunerinnerulernissaat, naammagileratsigu atornerluinerit meeqqallu piitsutut inuusut ulluinnarsiutinngulermata massakkut. Qanoq iliuuseqarfigineqarnera tapersersorniarlugu suliniuteqarpugut, Aviaaja Heilmann oqarpoq.
Meeqqat ilaqutariillu sineriassuarmi atugarissaartut amerlanerusut allaaserineqartarput.
- Aap atugarissaartunik ulikkaarpugut, kisianni naammanngilaq. Meeqqat tamarmik atugarissaassapput. Siunissaraavut meeqqat, suliniaqatigiit erseqqissaapput.
Suliniaqatigiit naalakkersuisunut tusaaqqupput.
- Tusaaqquvugut qanoq siunertaqarnerluta, sunalu angorusunneripput pillugu. Siunissami peqatigiiffiliornissarput naatsorsuutigaarput, soqutigineqarnera annertunermik, Aviaaja Heilmann oqarpoq.
Sinerissami illoqarfinni arfinilinni atsiortitsiortoqarsimavoq, naalakkersuisunut tunniunneqartussanik.
- Siunertaraarput qanoq iliuuseqaqataanissarput. Nipangernavianngilagut.
Inatsisartut ataatsimiittarfiannut apuunnermi oqalugiartoqarpoq, naalakkersuisunullu atsiornernik tunniussisoqarluni, Aviaaja Heilmann oqarpoq.
Meeqqat inuunerinnerulernissaat pillugu sinerissami atsiortitsiortornernik katillugit 3.445-nik katersisoqarput, takkulu naalakkersuisunut kommunalbestyrelsenullu tunniunneqarput, illoqarfinni ukunani: Nuuk, Nanortalik, Ilulissat, Sisimiut, Qaqortoq aamma Narsaq.