Meeqqat Inuunerissut: Meeqqanut Illuliornissaq pisariaqarunanngilaq
- Isumaqatigiippugut, ullumikkornit pitsaanerusumik sulisariaqartugut. Sumiiffinni assigiinngitsuni pitsaasumik sulisoqarpoq, immaqalu taakkua misissorlugit aallartikkuta pitsaanerussaaq, Line Frederiksen, oqarpoq.
Taamaalillunilu isumaginninnermut naalakkersuisoq, Maliina Abelsen, isumaqatigaa, ippassaq oqarmat, periarfissat pioreersut atorluarneqartariaqartut.
- Nunannerpoq, sinerissamiit inunnik katersuutitsigatta isumaqartunik, pitsaasunik aallartitsisoqareersoq aammali pitsaanerusumik iliuuseqarsinnaasugut. Uagut takorluugarput Maliina Abelsenillu takorluugaa Nunatsinnut tamarmut ersersipparput, Meqqat inuunerisut siulittaasuat oqarpoq.
Nunatsinnili tamarmi suliniartut misilittagaasa pitsaasut, ataatsimeersuarnermi saqqummereersut, eqikkarneqarnissaat pisariaqartinneqarpoq.
- Aasianni iliuusiannik torrallataasunik tusareerpugut. Nunatsinnili iliuutsit tamamik nalunaarsorneqarnissaat pisariaqarpoq, taamaalilluta ilisimasat siammarlugit immitsinnut ilikkarfigeqatigiinniassagatta, Line Frederiksen oqarpoq.
Aasianni Meeqqanik Ilaqutariinnillu sullissivik, Qaammaavik, 2000-mi ataatsimeersuartoqareernerani pilersinneqarpoq. Tassani meeqqat inuusuttullu nunaqqataasunik nukissaqarluartunit pikkorissartarsimasunit katsorsarneqartarput.
Meeqqalli inuusuttullu kinguaassiutimikkut atornerlunneqarsimasut amerlasuut ikorneqarneq ajornerat akuerisinnaannagu oqarnertik, Meeqqat inunerissut aalajangiusimavaat.
- Uppernarsaatissaqanngikkaangat suliassat ilaat naammassineqanngitsoortarput. Eqqartuussisoqanngikkaangat suliassaagaluit pisortanit unitsinneqartarmata, atornerlunneqarsimasut katsosarneqanngitsoortarput, Meeqqat Inuunerissut siulittaasuat, Line Frederiksen oqarpoq.
