Meeqqat internetimik atuinerannut angajoqqaat akisussaasuusut
- Taakkua meeqqat inuussuttuaqqallu ajoqersuuttussaavaat qarasaasiakkut atuinermi suut inerteqqutaanersut.
Meeqqat pillugit Siunnersuisoqatigiinni ilaasortaq, meeqqat kinguaassiuutitigut atoqatigiittut assinginik inuusuttuaqat 1000-nik sinneqartut siaruarterisimasutut unnerluutigineqarnerisa kingorna, taama oqarpoq,
AAMMA ATUARUK Kalaaleq meeqqanik atoqatiginnittunik siammarterisimasutut unnerluunneqartoq
Danmarkimi inuusuttuaqqat 1005-it taakkununnga ilaalluni angut inuusuttoq kalaaleq meeqqat kinguaassiuutitigut atoqatigiittut assinginik siaruarterisimasutut Rigspolitiinit ataasinngornermi unnerluutigineqarput.
Tassunga atatillugu Meeqqat pillugit Siunnersuisoqatigiinni ilaasortaq William Kriegel Qanoruumi oqarpoq, meeqqat qarasaasianik atuineranni angajoqqaat eqqummaarinnerusariaqartut.
- Pingaaruteqarpoq oqaatigissallugu meeqqat qarasaasianik atuineranni akisussaasuupput, angajoqqaat, inersimasut aamma inersimasut meeqqanik sullissisut, William Kriegel oqarpoq.
AAMMA ATUARUK Inuusuttorpassuit pornomik meeqqanik inuttalimmik siammarterisimasutut unnerluutigineqartut
Angajoqqaat meeqqaminnut erseqqissaasussaapput qarasaasiakkut atuinermi suut inerteqqutaanersut, Kriegel oqarpoq.
- Meeqqat inuusuttullu akornanni qarasaasianik atuinerat annertusoq naluneqanngilaq, taamaattumik meeqqat angajoqqaallu qarasaasiamik atuineq pillugu angerlarsimaffimmi tatigeqatigiillutik ammasumik oqaloqatigiittariaqarput, tassani oqaluuserisariaqarpaat qarasaasiami atuinermi killigititaasut pillugit aamma inatsisitigut qaangiinnginnissamut killigititaasut suunersut oqaluuseralugit, Kriegel oqarpoq.
William Kriegelip ilanngullugu erseqqissaatigaa, angajoqqaat qarasaasianik atuinermik ilikkarsimanngitsut inersimasunik qarasaasiamik atuinermik ilisimasaqartunut saaffiginnissinnaammata taakkualu meeqqanik oqaloqateqarlutik.