Meeqqat Indiami naalliutsitaasartut amerlaqaat

Indiami meeqqat pingasuugaangata marluk timimikkut arlaatigut naalliutsitaasarput, marlunnillu meeraqaraanni meeqqap aappaa kinguaassiuutimigut atornerlugaasarpoq. Meeqqanut inuusuttuaqqanullu innarliisarnerit pillugit misissuisitsinersuarmi nutaami tamanna paasineqartoq, Indiami tusagassiorfiit ilisimatitsipput.

Misissuisitsineq Indiami arnat meeqqaallu pillugit ministeqarfimmit suliarineqarpoq, misissuinerullumi tassa ersersippaa, meeqqanut kanngunartuliorsimanerit amerlaqisut.

- Meeqqanik naalliutsisarneq isertuussaagajuppoq nipangiulluinnarneqartarlunilu, arnanut meeqqanullu ministeri, Renuka Chowdhury, aviisimut Times of Indiamut oqarpoq.

Nutaanik inatsisiliortoqarnissaa Renuka Chowdhuryp neriorsuutigaa, meeqqat pisinnaatitaaffii illersorneqarsinnaaqqullugit, aamma meeqqanik atornerluisut sakkortunerusumik pillagaasarnissaat inatsisiliuunneqassasoq oqarluni.

Misissuisitsinersuaq ukiut marluk sinnerlugit pivoq, meeqqat tallimanik ukiullit, inuusuttullu 24-nik ukiullit tikillugit ukiullit, katillugit 15.000-t timikkut, tarnikkut, kinguaassiuutitigullu atornerluinernik apeqquteqarfigineqarsimallutik.

Nalunaarusiami paasisanut annilaarnartunut ilaavoq, meeqqanik atornerluinerit ilaqutaasunit imaluunniit meeqqanut akisussaasunit pisartut.