Kunngissap Frederik-up nuliatalu Maryp katinnerannut atatillugu Danmarkimi tusarnaartitsinersuarmi Rock´n Royal-imik taaguuteqartinneqartumi sinneqartoorutit ilaat 1 millioni koruunit, Nuummi meeqqat illussaannut Inneruulaq-mik taaguuteqartinneqartumut pisortatigoortumik nalunaaquttap akunnera ataaseq matuma siorna tunniunneqarput.
Tunniussassat kunngissakkunnit nulianiillu isumassarsiaaput, ullumilu katerisimaartoqarnerani, aningaasat sulisitsisut peqatigiiffianeersumut, suliniummilu ingerlatsisumut Kirsten Ørgård-imut tuinniunneqarput.
Nuummi meeqqat illutaarnissaanut sulissutiginnittut allat tassaaput Red Barnet, Rotary Klup, Lions Club Nuuk, Nuummilu sulisitsisut peqatigiiffiat.
Nuummi meeqqat illussaat Nuutoqqami neqarniarfiusimasumi inissisimasussaq Royal Greenland-imiit pisisarineqarpoq, novembarip aallaqqaataani meeqqat illussaanik sulissutiginnittunut tunniunneqassalluni.