Meeqqat illuinik pilersitsinissaq siunnersuutigaat
Nalunaarusiaq nutaaq, ullumi saqqummersoq, tunngavigalugu innersuussutit taakku takkupput, Kalaallit Nunaanni meeqqanik kinguaassiuutitigut atornerluisarneq pillugu Meeqqat Inuunerissut qaammatip kingulliup qiteqqunnerani ataatsimeersuareersullu.
- Meeqqat inunnik isumaginninnermut sulialinniit politiinut, tamaanngaaniillu tarnip pissusaanik ilisimasalinnut nakorsanullu uteqattaassanngillat. Meeqqat toqqissisimaffigisaminniittussaapput, aamma katsorsartinnissaminnut piumasaqaateqarnissaminnut pisussaaffeqarput, Meeqqat Inuunerissut siulittaasuat, Line Frederiksen, nassuiaavoq.
Nalunaarusiami Kalallit Nunaanni meeqqat illussaat sisamat innersuussutigai, kommunit tamarmik peqalersillugit. Taamaalinikkut meeqqat kinguaassiuutitigut innarlerneqarsimasut nunamit tamarmeersut assigiimmik suliarineqartassagaluarput, avatangiisinilu toqqissisimanartuni piginnaasunilu katsorsarneqarlutik.
Kalaallit Nunaanni meeqqat illuinik pilersitsinissaq sioqqullugu sullivimmik ataqatigiissaariffiusumik pilersitsinissaq suliniaqatigiiffiup innersuussutigaa.
Ataqatigiissaarilluni sulliviup meeqqat kinguaassiuutitigut innarlerneqarsimasut pillugit suliniutaasimasut assersuusiortassavai, attuumassuteqartunut ataqatigiissarneqarnissaat inatsitsigut qulakkeerneqassammat.
Kalaallit Nunaanni meeqqat illoqalernissat pillugu nalunaarusiaq isumaginninnermut peqqissutsimullu naalakkersuisumut suliassanngorlugu ingerlateqqinneqarpoq.
