Meeqqat Illuat sulisussaaleqivoq
Meeqqanut ulloq unnuarlu inissiisarfik Nuummiittoq Meeqqat Illuat perorsaasunik arfinilinnik maajip aallaqqaataaniit amigaateqalissaaq.
- Meeqqat Illuat perorsaasunut 21-inut atorfeqartitsivoq, maajilli aallaqqaataaniit perorsaasunik arfinilinnik amigaateqalissaagut. Qaammatini tallimanngulersuni taama sulisussaleqisimavugut, kisianni taama sulisussaaleqisarneq ukiuni arlalissuanngortuni aamma ajornartorsiutigereerparput, Torben Alne oqarpoq. Meeqqat Illuata maanna perorsaasunik sulisussarsiornerani suli qinnuteqartoqarsimanngilaq.
Meeqqat Illuanni immikkoortunut pingasunut agguakkami meeqqat arfinilinniit 14-inut ukiullit massakkut 13-it najugaqarput. Sulisut ikilimmata Meeqqat Illuanni immikkoortoq ataaseq matuneqartariaqarsimavoq.
- Perorsaasussaaleqineq meeqqanut maaniittunut tuttarpoq, naammattunillu sulisoqannginnatta sinerissami meeqqat maannga inissinneqarnissamut utaqqisut massakkut tallimaasut aamma tigusinnaanngilagut. Meeqqat taakku piaartumik inissinneqarnissamik pisariaqartitsisutut nalilerneqarput. Oqarsinnaavugullu meeqqat utaqqisinneqartut sulisussaaleqinermik taamaasillutik aamma eqqugaasut, Torben Alne oqarpoq.
Meeqqat Illuannut meeqqat inissinneqartartut annertuumik ajornartorsiuteqartuusarput, atuarnerminni tapersersorneqarnissamik annertuumik atorfissaqartitsisungortarsimasuupput ilaatigullu aserorterisarnermik annertuumik ajornartorsiuteqartunngorsimasuusarlutik.
Nunatsinni perorsaasutut ilinniarsimasunik sumiluuniit sulisussaaleqisoqartoq Torben Alne oqarpoq, isumaqarnerarporlu perorsaasut atugaat pillugit qinikkat massakkut pimoorullugu oqaluuserinnittariaqalersut.
Perorsaasutut ilinniarsimasut ulloq unnuarlu inissiisarfinni sulisut qaammammut 15.000 koruuninik aningaasarsiaqartarput, aningaasarsiaallu sulinerminni atugaannut naleqqukkunnaavissimasut Danmarkimilu assiganik suliaqartunut aamma naleqqiunneqarsinnaanngilluinnartut, Torben Alne erseqqissaavoq.
