Meeqqat Illuat sulisussaaleqivoq

Meeqqanut ulloq unnuarlu inissiisarfik Nuummiittoq Meeqqat Illuat perorsaasunik arfinilinnik maajip aallaqqaataaniit amigaateqalissaaq.

- Qaammatini tallimanngulersuni taama sulisussaleqisimavugut, kisiannili taama sulisussaaleqisarneq ukiuni arlalissuanngortuni ajornartorsiutigisarsimavarput. Maanna perorsaasunik sulisussarsiornitsinni suli qinnuteqartoqanngilaq, Torben Alne Meeqqat Illuata pisortaa oqarpoq.

Meeqqat Illuanni meeqqat najugaqartut arfinilinniit 14-inut ukiullit massakkut 13-iupput.

- Perorsaasussaaleqineq meeqqanut maaniittunut tuttarpoq, naammattunillu sulisoqannginnatta sinerissami meeqqat maannga inissinneqarnissamut utaqqisut massakkut tallimaasut aamma tigusinnaanngilagut. Oqarsinnaavugullu meeqqat utaqqisinneqartut sulisussaaleqinermik taamaasillutik aamma eqqugaasut, Torben Alne oqarpoq.

Nunatsinni perorsaasutut ilinniarsimasunik sulisussaaleqisarneq sumiluuniit ajornartorsiutaasartoq Torben Alne isumaqarpoq.

- Meeqqanik perorsaasutut ilinniagaqarsimasut ulloq unnuarlu inissiisarfinni sulisut qaammammut 15.000 koruuninik aningaasarsiaqartarput, aningaasarsiaallu sulinermi atugassarititaasunut naleqqiukkaanni ikippallaaqaat, Danmarkimilu assiganik suliaqartunut aamma naleqqiunneqarsinnaanatik, Torben Alne erseqqissaavoq.