Meeqqat illuat pillugu ataatsimeersuarnissaq aqagu aallartissaaq
Kalaallit Nunaanni meeqqat illuat pillugu ataatsimeersuarnissaq Katuarmi aqagu pingasunngornermi aallartinneqassaaq. Meeqqat inuusuttullu pillugit ilisimasallit USA-meersut, Islandimeersut, Danmarkimeersut kiisalu nunatsinneersut ataatsimeersuarnermi peqataatinneqassapput.
Allattoq Oline I. Olsen
septembarip 08-at 2009 06:06
- Meeqqat amerlavallaat kinguaassiutitigut atornerlunneqartarput, ikippallaartulli katsorsarneqartarput, tamanna akuerineqarsinnaanngilaq. Kalaallit Nunaanni meeqqanut suliniuteqarnernut tulleriiaarinermi Peqatigiiffiup meeqqat inuunerissut meeqqat illuat qaffasissumik inissisisimavaa, Peqatigiiffiup Meeqqat Inuunerissut siulittaasuat Lene Frederiksen tusagassiutinut nalunaaruteqarnermini allappoq.
Meeqqanik atornerlunneqarsimasunik katsorsaanerit sullissinerillu meeqqat illuanni ingerlanneqarnissaat siunertaavoq, meeqqat avatagiisini toqqissisimanartuni tapersersorneqarnissaat taamaalilluni anguneqarniassammat.
Ataatsimeersuarnermi meeqqat illuata aaqqissuussaanissaa kiisalu sullisisussai sammineqassapput.
