Meeqqat Illuanni pisortaq: Iliuusissanik pilersaarut pingaarnerpaavoq

Ulloq unnuarlu angerlarsimaffimmi ’Meeqqat Illuat’-anni forstanderi, Torben Alne allatut isumaqarpoq. Iliuusissatut pilersaarut aallaqqaammulli suliarisariaqarpoq nutarterneqartariaqarlunilu.

- Oqarsinnaavunga, pingaartumik meeraq paarsarput Meeqqat Illuannit angerlartussanngoraangat pilersaarusiortoqarsimannginnera kipiluttunartarmat. Kialluunniimmi eqqaamaneq ajorpaa, meeraq taamani paarsarileratsigu meeqqap kommunianut isumaqatigiissut qanoq oqaasertaqarnersoq. Arlaleriarluta taanna misiginikuuarput, Torben Alne nassuiaavoq.

Taamaammat iliuusissanik pilersaarusiaq amigaataasaraangat kommuni suleqatigalugu piaartumik suliariniartarparput. Meeraq sooruna ulloq unnuarlu angerlarsimaffimmiittariaqartoq? Qanoq ikiussavarput? Pilersaarusiaq meeqqap maaniinnerani aamma nutarsartuartarparput, allanngortitassaappallu allanngortillugu.

Iliuusissanik pilersaarutip amigaataanera angajoqqaat aamma naalliuutigisarpaat.

- Angajoqqaat nalusarpaat susoqarnersoq, meerartik sussanersoq, qanoq sivisutigisumik peqanngissanersoq apeqqutit akissutissaqanngitsut naalliuutigisarpaat, taamaammat pilersaarusioqataanissaat pingaartuuvoq, Torben Alne nassuiaavoq.

Aperaarput kommuninik tuavisaarisarnersut.

- Aap, ilaana. Ukiut ingerlaneranni iliuusissanik pilersaarusiortoqartarnera pitsanngoriartoqaaq, kisianni paasissutissanik amigaateqakkajuttarpugut, kommunimilu suliamik ingerlatsisumut allagaqarluta qinnutigisarpagut kingusinnerusukkullumi pisarlugit, oqarpoq.

Iliuusissanik pilersaarusiap oqaluttuuttarpaatigut, meeraq pillugu kommunip qanoq pilersaaruteqarneranik. Sooq meeraq Meeqqat Illuannut pisinneqarpa? Maaniinnerani anguniagassarput uagut suunersoq aamma paasisariaqaratsigu, iliuusissamik pilersaarusiaq pingaaruteqarpoq, Torben Alne naggasiivoq.

Ulloq unnuarlu meeqqat angerlarsimaffiat Meeqqat Illuat Nuummiittoq meeqqanut 18-inut inissaateqarpoq, ullumikkullu 13-inik paarsaqarluni.

Forstanderi Torben Alne, Meeqqat Illuanni ukiuni 35-ini pisortaasoq erseqqissaavoq sakkussaalluarmat iliuusissanik pilersaarusiornissaq pingaarnerpaasoq.

Radioaviisimit sinerissami ulloq unnuarlu angerlarsimaffinnut arlalinnut sianeqattaarnitsinni paasivarput pilersaarusiortoqartannginnera aamma taakku misillerfigisaraat.

- Pissutsilli meeqqat ikiorserneqarnissamut utaqqisut qitiusumik allattorsimaffeqalerneratigut pitsanngoriartornerarlugit, Torben Alne oqarpoq.