Meeqqat illersuisuata Kielsen nersualaaraa
Naalakkersuisut siulittaasuata ukiortaamut oqalugiaammini Nunatsinni meeqqat eqqartungaatsiarpai. Ukioq 2016 meeqqat ukiuattut taaneqarnikuuvoq, 2016-ilu sapaatip unnuaani 2017-inngoraluartoq taama suliniartoqaannassasoq, Kim Kielsenip oqariartuutigaa.
- Ukiummi tamarmik meeqqat ukiorisariaqaraluarpaat. Meerartagut siunissaraagut. Ullutsinni namminiilivinnissamut aqqut ingerlavigiuminarsarlugu ujaqqat piiarpagut. Meerartagullu taakkuusussaapput aqqusinniakkut tassuuna ingerlasussat, Kim Kielsen sapaatiummat ukiortaamut oqalugiaammini oqarpoq.
AAMMA ATUARUK Kielsenip ukiortaami oqalugiaataa pisussaaffiliinertaqanngilaq
Taama nalunaaruteqarneq meeqqat illersuisuata Aviâja Egede Lyngep nuannaarutigaa.
- Kissaatiginikooqaara meeqqat ukiuat 2016 ukiumut tassungaannaq atuutissanngitsoq, ukiulli qulikkaat sinnerlugit atuutissasoq. Allanngortitsiniarneq sivisusarpoq akisussaaffimmillu tigusinissarput pisariaqarluni. Taamaammat tusarlugu nuannaarutigaara ukiut tamarmik meeqqat ukiorisariaqaraat Naalakkersuisut Siulittaasuata isumaqatigimmanga, Meeqqat Illersuisuat tusagassiutinut allappoq.
Nunatsinnilu inersimasut tamarmik meeqqanit inuusuttunillu pillugit ataatsimut akisussaaffimmik tigusinissaat kaammattuutigaa, tamannalu Kim Kielsenip ukiortaami oqalugiaammini aamma eqqaavaa.
Inuit tamarmik 18-inik ukioqalernissamik tungaanut meeraasarput, meeqqallu taakku ineriartornissamut periarfissaqarlutik pitsaasumik peqqinnartumillu inuuneqarnissaannik qulakkeerneqarnissaat inersimasut akisussaaffigaat. Isumaqarpunga akisussaaffimmik tigusisoqarnissaa siulittaasup ukiortaami oqalugiaammini oqaatigilluaraa, Aviâja Egede Lynge allappoq.
Ukiortaamut oqalugiaat tamaat uani takuuk
