Assi: KNR

Meeqqat illersuisuata corona malittarisassat paasissutissartaat ersarissut amigaatigigai

Angajoqqaat corona pillugu killilersuinerit pillugit paasissutissat amigaataanerat pakatsissutigigaat, Aviâja Egede Lynge oqarpoq, taassuma oqartussat ersarinnerusumik attaveqarnissaat kissaatigaa.

Meeqqat marlunnit aqqaneq-marlunnut ukiullit novembarip ulluisa 21-aanni decembarip ulluisa tallimaanut assammik arsariarsinnaanatillu angajoqqaatit ilagalugit neriniartarfiliarsinnaanngillat.

Naalakkersuisummi killilersuutit pingaartumik meeqqat atuarfianni tuniluuttoqarnerunera pissutigalugu taakkununnga eqquinerusut atulersinnikuuaat.

Taakku Nuummi Upernavimmilu meeqqanut eqquinerupput.

Killilersuutit taakku ullumikkut atuukkunnaarput, killilersuutilli nunatsinnut tamarmut atuuttussat annertuut ullumikkut atuutilerput.

Taakku inersimasunut meeqqanullu aqqaneq-marluleereersimasunut eqquipput. 

AAMMA ATUARUK Inequ 7-inik ukiulik corona pillugu killilersuinerit pillugit: Ajunngikkaluarluni kusanaalaarpoq

Piffissami tassani meeqqanut killilersuisoqarnerani Meeqqat Illersuisuata, Aviâja Egede Lyngep angajoqqaat pakatsisimasut maluginiarpai.

Killilersuutillu nutaat atulernerat suli pakatsissutaasut, taassuma oqaatigaa.

- Uani eqqarsaatigivara piffisaq kingulleq maannakkut aamma eqqarsaatigalugu coronamik tunillatsittut akornanni meerarpassuupput taamaalillunilu angajoqqaarpassuit paasissutissanik ersarissunik amigaateqarnera ersarittorujussuanngoqqagami, tassa imaappoq, soorlu paatsiveerusimaarneq ernumanerlu angajoqqaat assigiinngitsunik atuuppoq, pissutigalugu paasissutissat annikinneri taavalu ilaatigut ersarippallaannginneri eqqarsaatigalugu.

Oqartussanit tusagassiuutinut nalunaarutit ersarinngitsut

Naak Naalakkersuisut killilersuutit nutaat pillugit tusagassiuutinut nalunaaruteqaraluartut oqartussat angajoqqaanut pitsaanerusumik paasissutissiisinnaasut taanna isumaqarpoq.

- Aalajangiussat nutaat takkukkaangata ikkunneqartarput inatsisitupajaatut isikkoqarlutik taavalu tusagassiuutitigut nuisarlutik. Kisianni angajoqqaaqarami tamakkuninnga paasissutissanut immaqa toqqaannartumik paasinnippallaanngittut, taamaammat Facebooki atorlugu immaqaluunniit videoraliornikkut imaluunniit allatigut ersarinnerulaartumik paasissutissiinerusumik peqarsinnaagaluartoq taamatut nalilerpara kaammattuutigerusullugu pisortat taanna samminerussagaat angajoqqaaqqarpassuummata eqqugaasut.

AAMMA ATUARUK Corona pillugu maleruagassat Nuummi upernavimmilu atuuttut nunatta sinnerani aamma atuussinnaalersut

Meeqqat illersuisuata oqarnera naapertorlugu suut qaqugukkut atuutissanersut atuutissannginnersulluunniit pingaartumik paatsuunganarput.

- Soorlu assersuutigalugu killilersuisoqalertillugu immaqaluunniit uku killilersuutit peertillugit allannguinerit assigiinngitsut pisaqattaarput maannakkut piffissaq kingulleq, maannakkulu allanngoqqillutik. Angajoqqaat amerlasuut uunga pisaramik soorlu ”unami? Qanoq iliussaagut?”. Maannakkut soorlu assersuutigalugu ukua qanermut assiaqutit pillugit angajoqqaat apeqqusiipput atoqqusaanersut. ”Avammut angalaleruttami?” Tassa apeqquterpassuit kaaviiaarput angajoqqaat akornanni, taamaammat paasissutissiineq ersarinnerusoq annerusorlu angajoqqaanut pisuguni paatsiveerunneq eqqissisimannginnerlu avaqqussinnaagaluarigut.

Tusagassiuutinut ikiuussinnaajunik ajussanngitsoq

Killilersuutit nutaat nunatsinnut tamarmut ullumikkut atuutilersinneqarput. Illoqarfimmi tunillatsittoqarfiusumi ulluni 14-ini tunillaaviup aallaaviata ilisimaneqannginnera apeqqutaassaaq.

Qanermut assiaqutinut tunngatillugu meeqqat aqqaneq marluleereersimasut tamanit ornigarneqarsinnaasuni assigiinngitsuni qanermut kiinnamulluunniit assiaquteqartussaapput.

KNR-ip imaluunniit nutaarsiassaqartitsiviit allat killilersuutinik paasissutissiinissaat pitsaassaaq, oqartussalli siullertut ersarinnerusumik paasissutissiisinnaagunik pitsaanerpaassagaluartoq,  Aviâja Egede Lynge isumaqarpoq:

- Tassa siullermik akisussaasut eqqarsaatigaakka, ukua pisortat paasissutissiinermut aamma akisussaaffeqartuummata annertuumik. Kisianni soorunami aamma qujanassagaluaqaaq tusagassiorfiit inersimasunut imaluunniit tamanut ersarinnerusumik aamma sammisaqarsinnaasuuppata angajoqqaanut.

Nunatsinni coronavirusi pillugu
killiffik

Tunillatseqqasut ...  
Ullumi tunillatsittut 85  
Siullermik kapitissimasut 73%  
Aappassaa kapitissimasut 68%  
Tunillanneqarsimasut 9.485  
Uninngasut 15  
Anersaartuuteqartitaasut 0  
Toqusut 4  
corona.nun.gl-imi kisitsit takukkit  
   Nutarterneqarpoq: 
Januaarip 22-at 15:00
 

Coronavirusimik tunillatsinissaq pinaveersaaruk