Meeqqat Illersuisuat naalakkersuisup oqaaseqaataanut: Ernumaammernaqaaq
Nunatsinni illoqarfinni ilinniarfeqarfiusuni arlalinni ilinniartunut ineqarfiit 16-it 2025-mi iserterfigineqarsinnaalissapput.
Nunatsinni inuusuttut ilinniartut pitsaanerusunik najugaqarfeqalertussanngornerat nuannaarutigigini, ilinniartitaanermut, kultureqarnermut ilageeqarnermullu naalakkersuisoq, Ane Lone Bagger (S), tusagassiorfinnut nalunaarummini allappoq.
AAMMA ATUARUK Illoqarfinni tallimani ilinniartut ineqarfiinik 16-inik sanaartortoqassasoq
Kisianni Meeqqat Illersuisuata MIO-meersup, Aviâja Egede Lyngep, oqaaseqaatip ilaa ernumaammernartoqartippaa. Taannami isumaqarpoq, Ane Lone Baggerip inuusuttut ingammik ikiortariallit artukkerlugit kimigiiserfigigai.
Ilinniartitaanermut, kultureqarnermut ilageeqarnermullu naalakkersuisup, Ane Lone Baggerip, oqaaseqaataa issuaqqissaarlugu imaappoq:
“Taamaattorli oqarsinnaalerpugut inuusuttortatta ilinnialernissaanut sinaakkutissat Naalakkersuisunit qulakkeerneqartut. Tullinnguupporlu inuusuttortatta namminneq nunattalu iluaqutigiligassaanik ilinniagaqalernissamik ilungersuuteqalernissaat”.
Pisariaqartinneqaqimmatami ilinniartunut ineqarfissaliortoqartussanngornera nuannaarutigigini, Aviâja Egede Lyngep erseqqissaatigaa. Meeqqat Illersuisuatali oqarnera naapertorlugu meeqqat inuusuttullu ilinniartut tarnikkut pitsaanerusumik atugaqartitaanissaasa qulakkeernissaat aamma pisariaqarluinnarpoq.
- Naalakkersuisut sinaakkutissagissaartitsilerniaramik inuusuttut siunissarissaarnissaat qulakkeeritsik, tusagassiorfinnut nalunaarummi oqaatigisutullusooq ippaat. Tamanna meerarpassuit inuusuttorpassuillu ilikkariartornermik ilinniakkamilluunniit naammassinninnissamik ajornakusoortitsisut eqqarsaatigalugit ernumaammernaqaaq, Aviâja Egede Lynge KNR-imut oqarpoq.
Siusinnerusukkut iliuuseqartassasut
Aasianni, Ilulissani, Nuummi, Qaqortumi Sisimiunilu ilinniartunut ineqarfiliortoqassaaq, taakkualu 508-nit najugaqarfigineqarsinnaassallutik. Aviâja Egede Lyngelli oqarnera naapertorlugu meeqqat inuusuttullu tapersersorneqarnissamik nutaanik nujugaqarfittaarnermit pisariaqartitsinerusortaqarput.
- Taakku ilaat sumiginnagaanikuupput, kinguaassiuutimikkut kannguttaatsuliorfigineqarnikuupput tarnimikkulluunniit ajornartorsiuteqarput. Meerartatta inuusuttortattalu ilinniagaqalernissamik namminneq tamaviaaruteqalernissaannik oqarneq ernumaammernartoqarpoq, Meeqqat Illersuisuat oqarpoq.
Kisiannimi inuusuttut najugaqarfigilersinnaajumaagaannik ilinniartunut ineqarfiliornissamut aningaasaliisoqarnera eqqarsaatigalugu piumasaqarfigineqarnerat ajorami?
- Tamanna qularnanngilluinnarpoq, inuusuttullu sukataaqquneqarsinnaasortaqarput. Meerartattali affaasa missaat meeqqat atuarfiannik naammassinninnerminniit ingerlaqqittannginnerat qaangiinnagassaanngilaq, tamannalu ilungersuanerannik amerlasuutigut peqquteqarpoq, Aviâja Egede Lynge oqarpoq.
Nunatsinni inuusuttut 16-t 25-llu akornanni ukiullit 29 procentii 2018-imi ilinniartuupput.
32 procentii aamma 2018-imi ilinniartuunngillat suliffeqaratilluunniit. Taakkuali 2014-imi amerlassusaannut sanilliullugit 6 procentinik ikileriarsimapput, taamanikkut 38 procentiummata.
Tusarfik: Naatsorsueqqissaartarfik
Politikerit siusinnerusukkut iliuuseqartarnissaannik inappai. Soorlu tarnip nakorsaanik ikiorserneqarnissamik aamma atuarfimmi ilinniarfimmilumi taperserneqarnissamik neqerooruteqarnikkut. Tamanna Aviâja Egede Lyngep oqarnera naapertorlugu inuusuttut ilaannut atuarfimmik naammassinnereernermi ilinniakkamik aallartitsisinnaanngikkaluanut annertoqqutaasinnaalluarpoq.
KNR-ip Ane Lone Bagger tamatumunnga atatillugu oqaaseqartinniarlugu saaffigigaluarpaa, iluatsinngitsumilli.
