Meeqqat pisinnaatitaaffiinik sullissivik, MIO ukiumi nutaami aallartilluarpoq.

Inuussutissarsiortut ataqagiit Round Table 112, Nuummi Danmarkimilu immikkoortortaqarfeqartoq 218.000 koruuninik MIO-mut tunissuteqartoq, meeqqat illersuisuat tusagassiuutinut nalunaarummi paasissutissiivoq.

Aningaasat inuussutissarsiortuni ataqatigiinni ilaasortanit katersorneqarsimapput.

Meeqqat illersuisuata, Aviâja Egede Lyngep aningaasanik tunissuteqartoqarnera attortissutigaa.

- Kusanarluinnarpoq attortinnarlunilu, Round Table-p sulinerput tapersersormagu aningaasallu taama amerlatigisut katersorsimallugit. Pingaartumillu nuannaarutigaara, paqumigisanik nungusaanermik sulinerput malugimmassuk, Aviaja Egede Lynge taama oqarpoq.

Round Table 112 tunissuteqarnermi ima tunngavilersuuteqarpoq:

- MIO-p paqumigisanik nungusaanermut aamma Naalagaffiit Peqatigiit Meeqqat Pisinnaatitaaffii pillugit Isumaqatigiissutaanik ilisimasaqarnerulernissamut suliaqarnera, meeqqat inuusuttullu atugarissaarnerannik inissisimaffiannillu pitsanngorsaanissamut alloriarneq pingaartuuvoq.

Round Table 112 Nuummi siulittaasup, Milan Lund Vraap, Tele Greenlandimi pisiortornermi pisortaasoq Meeqqat pisinnaatitaaffiinik sullissivimmut tapersiissuteqarneq nuannaarutigaa.

Kalaallit Nunaanni meeqqat inuusuttullu atugarissaarnerat annertuumik unammillerfiuvoq. Tulluusimaarutigalugu, Round Table 112 Nuuk aamma Round Table Danmark aningaasanik katersinikuupput, taamaasilluta MIO-p Kalaallit Nunaanni meeqqat inuusuttullu pisinnaatitaaffiinik qulakkeerinninniarluni sulineranut tapersersueqataasinnaalluta, kiisalu meeqqanut suliniutinik qulakkeerinneqataasinnaalluta.