Meeqqat illersorneqarnissaanni inatsisinik unioqqutitsisoqarpoq

Meeqqamik nuannaartitsigit – Sermitsiami sapaatip akunnerani uani saqqummersumi allassimasoqarpoq. Nuummi meeqqat ulloq unnuarlu angerlarsimaffimmiittut juullimi tunissutisinissaat anguniarlugu Ingrid Petersen aamma Sanne Mikkelsen taama kajungissaaripput.

Tunniusserusuttut poortukkap meqqianut allattuisinnaaniassammata meeqqat aqqi ukiuilu aviisimi ilanngullutik allanneqarsimapput.

Kajumissaarineq ajunnginnerpaamik siunertaqaraluartoq tamanut saqqummiussinermi meeqqat aqqisa ilanngunneqarsimaneri Ilaqutariinnut Pisortaqarfiup akuerisinnaannginnerarpaa.

- Meeqqat illersorneqarnissaannik inatsisinik tamanna unioqqutitsineruvoq, Martha Lund Olsen Namminersornerullutik Oqartussat nittartagaannut ilanngussamini allassimavoq.

- Ilaqutariinnermut pisortaqarfiup meeqqat aqqisa tamanut saqqummiunneqarsimanerat ajuusaarutigaa, minnerunngitsumik meeqqat ilaqutaasalu nipangiussisimasussaatitaanermik inatsisip atorneqarnissaanik piumasaqarsinnaaneri eqqarsaatigeqqaarnagit taamatut saqqummiussisoqarsimanera ajuusaarutigaarput, Martha Lund Olsen Ilaqutariinnermut pisortaqarfiup pisortaa oqarpoq.

Sermitsiami aaqqissuisoq oqaaseqartinniaraluaratsigu iluatsitsinngilavut.