Meeqqat ileqqunik kingornussisartut qimarnguinni takuneqartarput
Persuttaasarnerup ajornartorsiutaanera Regine Enoksenip tupaallaatiginngilaa.
-qimarnguinni atuisartut kisitsisitigut annertungaatsiartarput, Saaffiginnittarfiit Qimarnguiillu Kattuffianni siulittaasoq Regine Enoksen oqarpoq.
Meeqqat ilaqutariit iluanni iliuuserisassatik angajoqqaaminnit iliniartarpaat. ileqqunik kingornussisarnerup qimarnguinni aamma takuneqartartoq Regine Enoksen oqarpoq.
- Qimarnguinni sinerissamiittuni 1980-ikkut aallartinneranni meeqqat anaanatik aqqutigalugit atuisartut, inersimasunngornerminni taakkuusarput aamma qimarnguinnik atuisut, Regine Enoksen oqarpoq.
Bodil Kleist Schierbæk peroriartornermini ileqqorineqartut nammineq aamma ingerlateqqillugit misigisimavai. Bodil Kleist Schierbæk persuttaasartumik ukiut 30-t matuma siorna aappaqarsimavoq. Persuttaasartumik aappaqarsimanermi kingunerisaanik suli ullumikkut timimigut tarnimigullu innarlerneqarsimanini malugisarpaa.
- Qimarngueqarfinni ataasiinnarmik sulisoqartarpoq, taakkualu annertunerusumik meeqqanik sullissinissaminnut nukissaqarneq ajorput. Taamaattumik pingaaruteqartorujussuungaluarpoq qimarnguinni meeqqanik aamma sullissisoqalernissaa, Regine Enoksen oqarpoq.
