Meeqqat ileqqaarutinut kontotaartinneqarput
Kontotaarninni pilluarit! Taama qulequtalimmik Namminersornerullutik Oqartussat Atuagagdliutit aqqutigalugit allagarsiipput. Matumani pineqartut tassaapput, meeqqanut ukiormanna atuutilersumik ileqqaaruteqalersitsineq.
Kikkut pisinnaatitaanersut suullu piumasaqaataanersut misissorpavut.
Meeqqat nunatsinni najugallit ukioqanngitsunit 18-inut ukiullit tamarmik ileqqaarutinik aningaaserivimmi GrønlandsBankenimi akileraaruteqaataanngitsumik kontotaartinneqarput aningaasallu siulliit 1.000 koruunit siulliit ikineqareerput.
Inatsisartut meeqqanut ileqqaakkat pillugit inatsisaat 2006-imeersoq naapertorlugu meeqqat uku ileqqaagassaannik tunineqarput: meeqqat nunatsinni aalajangersimasumik najugallit, meeqqat angerlarsimaffiup avataanut Danmarkimi, Savalimmiuni imaluunnit nunani allani inissinneqarsimasut, meeqqat annertuumik innarluutillit nunatta avataanut Danmarkimi, Savalimmiuni nunanilu allani inissinneqarsimasut, meeqqap sulisitsisua meeqqap nunatta avataani ilinniarneranut atatillugu ilinniagaqarnersiuteqarsinnaatitaasoq, meeqqap angajoqqaani ilinniagaqarnersiutillit peqatigalugit nunatta avataanut nuussimasoq, meeqqat angajoqqaat ilinniarnerannut atorfeqarnerannulluunnit atatillugu nunatta avataanut nuussimasut imaluunnit nunatta avataanut efterskolernermini tapiissutisisarsimasut ileqqaarutinik tunineqarput.
Aningaasanik ukiut tamaasa ikisisoqartassaaq, qanorlu amerlatigisunik ikisisoqartassanersoq aningaasanut inatsisaat aqqutigalugu aalajangersaasoqartassaaq.
Aningaasat qanoq tiguneqartassanersut aamma aalajangersarneqarsimavoq.
Aningaasat aningaaserivimmut qinnuteqarnikkut aatsaat tiguneqarsinnaapput, meeqqallu 18-ileereernerani qaammatip naanerani tunniunneqartassapput. Ileqqaakkat aalajangersimasunuinnaq aamma atussaasut uppernarsarsinnaagaanni aatsaat tiguneqarsinnaapput, soorlu: sivikinnerpaamik ukiumi ataatsimi ilinniarniaraanni, nammineq najugassamik sananiaraanni pisiniaraanniluunnit soorlu piginneqatigiilluni illuliamik, najugassamik attartorluni siulequtsiinissamut siumoorluniluunnit akiliutissamut, najugarisamik pitsanngorsaanermut alliliinissamulluunnit, illumi atortorissaarutinik, pequtinik natersuarnillu pisinermut, sullivimmik namminersortumik pilersitsinermut kiisalu selskabini inuuussutissarsiornermik ingerlatalinni aktienik piginneqataassutsinillu pisinermut ileqqaakkat atorniarlugit uppernarsarsinnaagaanni aatsaat tiguneqarsinnaapput.
Meeqqat 18.000-it kontotaartinneqarput.
