Meeqqat ilaannaat unnukkorsiutitortarput

Nunaqarfinni meeqqat atuartut 7 %-ii namminneq oqarsimanerattut unnukkorsiutitorneq ajorput, meeqqallu affaat sinnilaaginnarlugit ullut tamaasa unnukkorsiutitortarnerarlutik. Illoqarfinni meeqqat tamatuma tungaatigut atugarissaarnerupput, 2 %-ii unnukkorsiutitorneq ajorput, 85 %-illu ullut tamaasa unnukkorsiutitortarnerarlutik.

Meeqqat atuarfianni atuartut peqqissusaat pillugu misissuinerup saqqummiunneqaqqammersup inernerata tamanna takutippaa. Kalaaliaqqat nunarsuarmi tamani aamma naatitartornikinnerpaapput. Taamaatuttaaq 13-init 15-inut ukiullit oqimaannerpaallutillu pualanerpaapput. Kalaallit Nunaata USA aamma Malta tamatumunnga tunngatillugu normu 1-ioqatigai.

Meeqqat pualanerat tupigisassaanngilaq, meeqqat aalajangersimasumik nerinissamut taarsiullugu mamakujuttutornerpaallutillu sodavanditornerpaammata. Illoqarfinni meeqqat pingasuugaangata ataaseq ullut tamaasa mamakujuttutorlunilu sodavanditortarpoq, nunaqarfinnili meeqqat marluugaangata ataaseq ullut tamaasa tamakkutortarluni.

Nunaqarfinni illoqarfinnilu meeqqat pualavallaarnerat takuneqarsinnaalluarpoq, nunaqarfinni meeqqat pingajorarterutaat pualavallaarmata, illoqarfinni meeqqat tallimaagaangata ataaseq pualavallaartarluni.