Meeqqat ikorfartortarialippassuupput
Uummannap kommuniani meeqqanut kulturimullu pisortaq, Kunuunnguaq Fleischer mianersoqqusivoq. Meeqqat sumiginnagaasimasut pillugit siorna misissuisimanermit inernerit ajoraluartumik suli atuupput. Taassuma ilimagaa, kommunit allat assingusumik misissuigaluarunik aamma taamatut qulaajassagaluartut.
-Qularinngilara kommunit allat taamatut paasiniaasuugunik kisitsisit taamaattut aamma qulaajassagaluaraat. Misissuinigut arlaqarput. Ilaatigut aamma siorna psykologimik atorfinitsitsinitsinnut atatillugu immikkut psykologimik allamik aappaqartipparput, marluullutillu sulineq aallarnisarniarlugu paasiniaqqaarpaat kommunitsinniuna immikkut ikorfartortariallit qanoq annertutigisut? Taava taanna misissuineq atuarfinni ilaatigut apersuinikkut ingerlanneqarpoq, meeqqerivinnilu apersuinikkut. Kisitsisit taakkua uppernarsinissaat soorunami assut kissaatiginarsimagaluarpoq, inunnillu isumaginnittoqarfiup aamma ilassuteqarnissaa, Kunuunnguaq Fleischer oqarpoq.
Tamannali ulloq manna tikillugu piviusunngorsinnaanngitsoq Kunuunnguaq Fleischerip ilanngullugu oqaatigaa, tamannalu inuttassaaleqinerujussuarmik ilaatigut peqquteqarnerarlugu.
Misissuinerit takutippaat meerarparujussuit sumiginnagaasimagamik ikorfartorneqartariaqartut, Kunuunnguaq Fleischerilu oqaluttuarpoq assigiinngitsunik suliniuteqarlutik.
-Assigiinngitsunik suliniuteqarpugut, toqqammaviatigulli aamma qularutissaanngilaq inersimasut assigiinngitsutigut ikorfartorneqarnissaat ilanngullugu eqqarsaatiginerusariaqartut ilagissagaat. Aamma isertorsinnanngilarput taamatut ajornartorsiuteqarnermi annerusumik pissutaammat imigassamik atuinerliorneq, Kunuunnguaq Fleischer oqarpoq.
Uummannap kommuniani meeqanut kulturimullu pisortaq Kunuunnguaq Fleischer Jens Thorin-imut taama oqarpoq.
Inatsisartut ilaqutariinnermut ataatsimiisitaliaanni siulittaasoq Agathe Fontain, inatsisartut pingasunngorpat ataatsimiilernissaannut siunnersuuteqarpoq, kommunit tamarmik meeqqanut politikkeqalernissaat anguniarlugu qitiusuminngaannit qanoq iliortoqartariaqarneranik apeqquteqaat aal-laavigalugu oqallittoqassasoq. Kommunit meeqqanut iliuusissatut pilersaaruteqassasut peqqussummi allaqqasimasoqareeraluartoq, kommunit arfiniliinnaat maannamut meeqqanut politikkeqarput.
