Meeqqat ikiortariaqartut sumiginnarpagut
Naalakkersuisup susassaqarfimmi sulinera IA-p naammaginartinngilaa, apersoreerneratali kingorna isumalluarnerulersimapput. Martha Lund Osenip neriorsuutigaa siunissami qanittumi iliuuseqartoqassasoq, IA-llu tamatuminnga eqquutsitsinissaa nakkutiginiarpaa.
-Uanga imatut paasivara, Martha Lund Olsenip kommunini isumaginninnermut pisortanut allagaqarniartoq ajornartorsiut erseqqissaatigalugu. Meeqqat angerlarsimaffiup avataanut inissinneqarimasut sumiginnarpagut, meeqqanullu, angajoqqaajusunut sullissivinnullu inissinneqarfigisaannut ajornartorsiortitsivoq, Juliane Henningsen knr.gl-imut oqarpoq.
Inatsisit malillugit iliuusissatut pilersaarutit suliarineqartarnissaat kommunit pisussaaffigaat, taamaammaat aammapingaaruteqarpoq ajornartorsiut qaangerniarneqassappat kommuninut pisussaaffiliisunik isumaqatigiissusiortoqarnissaa. Ajornartorsiut pilertortumik aaqqinneqartariaqarpoq, illuatungiliuttuni partiit anginersaat isumaqarpoq.
-Meeqqammi pisinnaatitaaffiinik unioqqutitsineruvoq, tamannalu uagut peqataaffigerusunngilarput. Paasitinneqarpugut susassaqarfimmut aningaasaliissutit aappagu amerlanerussasut, tamannali utaqqisinnaanngilarput. Meeqqanut inuusuttunullu angerlarsimaffiup avataanut inissinneqarsimasunut tunngasut iluamik ingerlanneqartussaapput. Meeqqammi pineqartut tassaapput sumiginnagaasimasut peroriartornerminnilu atugarliorsimasut. Inuiaqatigiinnit aamma sumiginnagaanissartik pisariaqartinngilaat, Juliane Henningsen oqarpoq.
