Meeqqat Fredericialiassapput

Ilulissani meeqqat atuarfiani 5 klassini atuartut, ukiut kingulliit 38-it Fredericiamut angalatinneqartaraluartut, angajoqqaarsiassaaleqissunneqalerlutik iluatsinngileraluarpoq. Fredericiamili tusagassiutini eqqaaneqareersullu angalasinnaanerat iluatsilersoq, Fredericiap kommuniani kalaallit nunaat pillugu ataatsimiisitaliami siulittaasoq John Bech Hansen oqarpoq.

- Nalunaarfissaq kingulleq nallermat angajoqqaarsiaajumallutik nalunaarsimasut arfiniliinnaasimapput, tassalu meeqqat 57-it tikittussaallutik. Taamaariarmat ernumalerlunga tusagassiutinut nalunaaruteqarpunga. Taassuma kingorna paasinarsivoq, atuarfinni arlalinni sulisut nutaat nalusimagaat qanorpiaq pisoqartarnersoq. Sunaafa paatsuuisoqarsimasoq, tassami aamma uanga nammineq tunginninngaanniit kukkuneq pivoq, sulisummi nutaat qanoq iliortoqartarneranik nammineerlunga ilitsersuuttussaagaluarpakka. Kisianni maannakkut tassa iluatsippoq. Meeqqat tamangajavimmik angajoqqaarsiassaanik pissarsissunneqareerput, ikittuinnaat suli inissarsineqanngillat, angajoqqaarsiassanilli pissarsinissaq qularnanngilaq. Aamma meeqqat tikinnissaat erinigineqaqaaq, Fredericiap kommuniani kalaallit nunaat pillugu ataatsimiisitaliami siulittaasoq John Bech Hansen naggasiilluni taama oqarpoq. Ukioq manna Iluliarmiuaqqat ukiut 39-issaat Fredericialiassapput.