Meeqqat diabeteseqartut ilinniartinneqassapput

februaarip 12-at 2007 16:18

Meeqqat sukkornermik nappaatilllit arfinillit qanigisaallu, sukkorneq pillugu ilisimasariaqartut pillugit Dronning Ingrid-ip napparsimavissuani ulluni tulliuttuni pingasuni atuartinneqassapput.

Meeqqat sinerissameersut Nuummeersullu meeqqat nakorsaanit misissorneqassapput, nappaatertik pillugu imminnut nakorsartarnissaminnik iliuusissamminnillu ilinniartinneqassallutik. Timersorneq, nerisaqarneq mamakujuttutorsinnaanerlu aamma pillugit atuartinneqassallutik.

Meeqqat sukkornerminnik type 1-imik taaguuteqartumik nappaateqartut, Nuummi ukiut tamaasa katersorneqartarput, meeqqallu nakorsaat Britta Olsen oqarpoq, nunatsinni meeqqat sukkornermik nappaateqartut ukiut tamaasa ataatsimik ilasartut.

Meeqqat arfineq pingasuniit 15-ininut ukiullit, sukkornermik nappaat pillugu atuartinneqarnerminni sammissavaat; nerisassanik pisiniarneq, nerisassiorneq, nerriviliorneq, nerisassallu peqqinnartut.