Meeqqat Danmarkimut aallarunneqarnissaat orniginanngilaq
Meeqqat inuusuttuaqqallu inuuniarnermikkut ajornartorsiuteqartut Kangerlussuarmi ulloq unnuarlu angerlarsimaffissaanni, januaarip aallaqqaataani aallartittussami, inissat quliusut saniatigut meeqqat inuusuttuaqallu inissinneqarnissaminnik utaqqisut 14-it, sumi inissinneqarnissaat Ilaqutariinnermut Naalakkersuisup, Mimi Karlsenip aamma misissortileruttorpaa.
- Taakku utaqqisut 14-it sumi inissinneqarnissaat misissuinitsinni ilaapput aamma misissorparput ulloq unnuarlu angerlarsimaffinni qanoq nikititerisoqarsinnaanersoq, taama Ilaqutariinnermut Naalakkersuisoq, Mimi Karlsen oqarpoq.
Meeqqat inuusuttuaqqallu pingasut, Kommune Kujallermi najugaqartut, massakkorpiarlu ikiorneqarnissaminnik pisariaqartitsisut, Nunatsinni ulloq unnuarlu angerlarsimaffinnut inissaqartinneqanngippata, allatut ajornartumik Danmarkiliartinnissaat avaqqunneqarsinnaanngitsoq, Kommune Kujallermi inunnik isumaginninnermut pisortap, Mikkel Balle oqaatigaa.
Mimi Karlsenip naalakkersuisoqarfiani maanna misissorneqaleruttorpoq taakku Danmarkiliartinnagit Nunatsinniiginnartinneqarnissaat.
- Danmarkiliartitsinissaq orniginanngilaq, taamaamallu suliat annertuut maanna ingerlappagut paasiniarlugu qanoq periarfissaqartoqarnersoq.
Ima paasisariaqassava tassa meeqqanik inuusuttuaqqanillu Danmarkiliartitsisoqassanngitsoq?
- Tassa periarfissat maani Nunatsinniittut assigiinngitsut misissorpagut, Mimi Karlsen taama oqarpoq.
Nunatsinnili ulloq unnuarlu meeqqanut inuusuttuaqqanullu angerlarsimaffiit tamarluinnarmik maanna ulikkaaqqapput, taamaattumillu immikkut ittumik nikititerusoqarnikkut tamanna aaqqinniarneqarluni.
- Meeqqanik sumiiffinni nikititerissagaanni pingaartorujussuuvoq, meeqqat killiffissiorsimanissaat aamma ajornartorsiutaat qanoq ittuunersut paasilluinnaarneqarnissaat, tamakkuuppullu suliatta ilagisaat. Meeqqat sumik ajornartorsiuteqarnersut aamma qanoq ikiortariaqarnersut misissorparput, taamaalilluta meeqqat qanoq ajornartorsiuteqarneri tunngavigalugit sumi inissinneqarnissaat misissorlutigu, taama Ilaqutariinnermut Naalakkersuisoq, Mimi Karlsen oqarpoq.
