Meeqqat biilinik aallarussisartut ukiukilliartorput

Nuummi meeqqat biilinik aallarussisarnerat siornatigut annikilliartorsimagaluartoq annertusiartoqqilermasoq aallarussisartullu ukiukilliartornerat Nuup Kommuniani miljøarbejderisut sulisuusut maluginiarpaat.

Sapaatip akunnerata naanerani Nuummi pisimasut aallaavigalugit Nuup Kommuneani miljøarbejderit ittuat Jakob Fencher Noahsen ima oqarpoq:

- Meeqqat ukiukitsuaqqat biilinik aallarussisartut maannakkorpiaq qulit 15-illu akornanniiittut ajornartorsiutigaavut.

Taanna aamma oqarpoq meeqqat biilinik aallarussisartut siornatigornit ukiukinneruleriartortut:

-Meeqqat biilinik aallarussisartut ukiukinnerulersimapput ukioq manna.

Meeqqat taama iluuseqartartut angajoqqaavi tassaanerupput ulluinnarni inuunerminni perorsaanermilu tapersersortariallit.

Meeqqat ikiorserniarlugit suliniarnermi angajoqqaat peqataatinneqartarput, kisiannili angajoqqaat suleqatiginiarneri ajornakusoorsinnaasarpoq:

- Meeqqat susassaqartinniarlugit angajoqqaat peqatigalugit suliniuteqartarpugut. Angajoqqaat suleqatigalugit ajornartorsiut qaangerniagassaavoq, angajoqqaalli suleqatiginiarneri ajornakusoorsinnaasarpoq, Jakob Fencker-Noahsen oqarpoq.

Nuup kommuneani socialeqarnermut pisortaq Vibeke Møller Jensen oqarpoq meeqqat akornanni pinerlunniartarnermi ajornartorsiutit sivisuumik ingerlareersut. Meqqat 100-t missaanniittut pinerlunniarnermik ajornartorsiuteqartut nakkutigineqarput.

- Kingusinaannginnitsinni meeqqat inuusuttuaqqallu iliuuseqarfiginiarsaraagut, Vibeke Møller Jensen oqarpoq.