Meeqqat biilinik aallarussiniarnermik nanisiarinnilersut
Nuummi imigassartorsimallutik aalakoorlutillu biilertut kisimik ajornartorsiutaajunnaarput, tamatuma saniatigut meeqqat inuusuttuaqqallu biilinik aallarussiniartartut amerlattikkaluttuinnarsimammata. Nuummi politiit taama ilisimatitsipput. Meeqqat inuusuttuaqqallu biilinik aallaurussiniat sapaatip akunnerata matuma naanerani ingasavissimasut politeeq pigaartuusoq Per Langborg oqarpoq:
- Meeqqat inuusuttuaqqallu biilinik aallarussiniat ullumikkut ilanngullugu naammattuukkagut qulingiluaniit 15-it ilanngullugit ukioqartuupput. Biilinik aallarussinerni ukiukinnerpaat aquttuusarsimanngillat, ilaasuusarsimallutilli, biilinillu aallarussinerit ulluugaluarpat unnuaagaluarpalluunniit pisarput, naamattuukagullu kingulliit ullumi nal marlunngulersoq naammattoorpagut, Per Langborg oqaluttuarpoq.
Nuummi meeqqat biilinik aallarussiniartalersimasut amerlanersaat politeeqarfimmut uteqattaartuusut Per Langborg aamma oqarpoq:
- Ilimatsaapparput meeqqat ilaat aalajangersimasut ikioqatigiillutik aallarussisartuusut.
Meeqqat biilinik aallarussisimasut tigusarineqartut pinerluttulerinermi inatsit naapertorlugu ukiukitsuusarmata politeeqarfimmut eqqullugit killisiorneqaleraangata Nuummi avatangiisinut nakkutilliisoq Miljøvagte peqataasinneqartarpoq, taassuma saniatigut angajoqqaat aamma peqataaqquneqartarlutik.
Meeqqat ukiukitsut taama biilinik aallarussiniartarnerat inuunermut assut ulorianartuusoq Per Langborg erseqqissaavoq.
- Meeqqat ilaat ima mikitigisarput allaat biilini tummagassat inortarlugit igalaakkullu isigisaqarsinnaasaratik. Ullaaq Nuussuarmi illoqarfiup immikkoortuani biilinik aallarusseriartoqarpoq, napparummullu aportoqarluni, qujanartumilli meeqqat aallarussisut ajoqusinngillat.
Per Langborgip erseqqissaatigaa maluginiarsimagitsik Nuummi biiliutillit arlalissuit biilitik ikumatiinnarlugit matuersaataaqqaarnagillu piffissami kingullermi qimattalersimagaat.
Tamanna pillugu Nuummi politiit biiliutilinnut kaammattuipput biilertik qimassatillugu pinngitsooratik parnaartaqqullugu matuersaatillu nassartaqqullugit. Aama ilisimatitsissutigineqarpoq biilit Toyota Tercel-imik taaguutillit aallarunneqarnerpaasartut ammaruminarnertik pissutigalugu, taamaattumik taamaatunik biiliutillit aquummut parnaarsaammik peqaleqqullugit kaammattorneqarput.
