Meeqqat Autismemik ADHD-millu nappaatillit angajoqqaavi ernumapput

Angajoqqaat autismemik adhd-millu nappaatilinnik meerallit – meeqqanik dampertunik siusinnerusukkut taaneqartartut – meeqqamik siunissaat ilungersuutigeqaat.

Taama nappaatillit tassaapput meeqqat qaratsap pisariaqartitaanik akoqanngippallaarneq pissutigalugu qasujasut, qasujanerli iisartagartornikkut peerniarneqartarpoq.

Meeqqanut taama nappaatilinnut Ilulissani immikkut atuarfeqarpoq. Taama napparsimasut siusinnerusumut naleqqiullugu ullumikkut amerlanerummata atuarfik pilersinneqarsimanngilaq, pissutaavorli nappaatip suussusianik maanna paasinninnerulersimaneq, taamaalillutik atuartut pisariaqartitsinermikkut ikiorneqarsinnaanerulerlutik. Kisiannili meeqqat atuarnerisa nalaanni taamaallaat taama iliortoqarsinnaavoq.

Meeqqammi taama nappaatillit immikkut atuarfeqartinneqaraluartut, siunissaat nalorninartoqartaqaaq, Danmarkimi immikkut ittunut efterskoleriartorsinnaapput, taamaalioreerunik allamik qinigassaqaratik, siusinaarlutik soraarnerussutisialittut taamaallaat inuusariaqassallutik.

Tamanna angajoqqaat naammaginartinngilaat, meeqqammi taamaattut pikkorissorujussuusinnaapput, taamaallaat misigissutsinut tunngasunut ajornartorsiuteqarsinnaasarlutik, ilinniagaqarluarsinnaappulli.