Meeqqat atugarliortut pillugit isiginnaartitsisartoq tunulialerpoq

Tunumi meeqqat atugarliorlutik inuusut TV-avisimit ukioq kingulleq ilanngutassiarineqarpoq. Ilanngutassiaq oqallinnermik pilersitsivoq ministeriunerullu nunatsinni meeqqat atugarisaasa misissuiffigineqarnissaat piumasaraa. Tamatuma kingorna meeqqat nipangiunneqarput.

Tasiilami meeqqanik sammisassaqartitsisartut ilaat tassaavoq ilitsersuisartoq isiginnaartitsisartorlu Orto Ignatiussen. Tasiilami isiginnaartitsisartoqatigiit ”Qinngorniit” meeqqat isiginnaartitsinermik iluatsilluartumik ukiuni arlalinni sungiusartarpai.

- Isiginnaartitsineq aqqutigalugu meeqqat ammarsinnaapput nammineernissartillu ilinniarsinnaallugu, Orto Ignatiussen isumaqarpoq:

- Meeqqat sungiusaqataasarnermikkut ilinniartarpaat anersaakkut timikkut aamma silarsuarmut ammariartuaarnissaq. Tamanna assortugassaanngilaq. Meeqqat peqataasarnerminni ilinniagarisartagaat assigiinneq ajorput, soorlu uangaavunga, sumiippunga, kinaavunga, susungaana. Sinittutut ileriarlutik iterfigisutut ilisarput assorsuarlu nuannaralugu peqataaffigisarpaat, Orto Ignatiussen taama oqarpoq. Nangipporlu Danmarkimiit tikinnissannut meeqqat 70-t utaqqikatapput.

Ortu Ignatiussen tikeriarpat meeqqat isiginnaartitsissut sungiusariarlugu Inuiattut ullorsiornermi isiginnaartitsissutigissavaat.

Tunumi meeqqat imerajuttuuneq, persuttaasarneq sumiginnagaanerlu peqqutigalugit atugarliorlutik inuusut aggustimi TV-avisimi ilanngutassiarineqarpoq.

Ilanngutassiaq inuppassuarnik ajuallatitsivoq – minnerunngitsumik tunumiunik. Ilanngutassialli oqallinnerulluunniit angajoqqaat eqqarsalersissimannguatsiarpai, Orto Ignatiussen oqarpoq.

- Ilimagivara angajoqqaat paasinninnerulersimanissaat. Tamatumalu kingunerisaanik meeqqatik paarinerulersimannguatsiarpaat. Imannguatsiarpormi soorlu tunniutiinnariarlutik meeqqaminnik paarsinerulersimasut tapersersuinerullutillu. Aamma malunnarpoq meeqqatik paariutigalugit imminnut paarinerat.

Orto Ignatiussen taama oqarpoq, taanna aappaagu isiginnaartitsisartuunerminik ukiunik qulinngortorsiortussaavoq.