Meeqqat atugarliornerat misissortariaqarsoraat
Nunatsinni meeqqat kaattut pillugit piffissami kingullermi oqallinnermut atatillugu taama nalunaaruteqartoqarpoq. Aamma Nunat Avannarliit Siunnersuisoqatigiiffiata immikkut ikiorsiinissamik pisariaqartitsisoqarnersoq misissorniarpaa.
Nunani Avannarlerni Siunnersuisoqatigiit Atugarissaarneq pillugu Ataatsimiititaliaat Nunatsinni meeqqat atugarissaanngitsut pillugit qanoq iliuuseqartoqarneranik paasitinneqarusuppoq aamma ajornartorsiuteqarnerpaanut ikiuigasuartoqartarnersoq Nunat Avannarliit Siunnersuisoqatigiivisa paaserusuppaat.
Siunnersuisoqatigiit Nunat Avannarliit maligassiuisutut inissisimanerisa pingaaruteqarnerat tikkuarpaat, aamma aningaasarsiornikkut ajornartorsiortoqaraluartoq apeqqutit atugarissaarnermut tunngasut isiginiarneqartariaqartut oqaatigalugu.
- Meeqqanik sumiginnaaneq, kinguaassiuutitigut atornerluineq, tarnikkut timikkullu innarliineq, imminut toquttarneq, ikiaroorniutinillu atornerluineq, tamakkuupput aningaasarsiornikkut ajornartorsiornerup nalaani Nunani Avannarlerni puigorneqartariaqanngitsut, Nunani Avannarlerni Siunnersuisoqatigiit tikkuaapput nangillutillu:
- Nunani tamalaani aningaasarsiornikkut ajornartoornerup kinguneranik inooqatigiinnikkut ajornartorsiutit ilisimaneqareersut annerulernerat kingunerisinnaavaa, aamma meeqqat atugarissaanngitsut atugarissaannginnerulernerat, Nunat Avannarliit Siunnersuisoqatigiivi allapput.
