Meeqqat atugaat pitsanngorsarniarlugit siunnersuutit naalakkersuisut itigartitsissutigaat

Nunatsinni meerarpassuit kaattarnerarlugit arlalinnik nalunaarusiaqaraluartoq, meeqqat ilaqutariillu meerartallit atugaat pitsanngorsarniarlugit Inatsisartuni ilaasortat arlallit siunnersuutaat Naalakkersuisunit siorna upernaakkut ukiakkullu ataatsimiinnerni itigartinneqartarput.
Allattoq Jaaku Lyberth
januaarip 23-at 2009 16:50

FN-ip ataaniittumi UNICEF-imi sulisut, nalinginnaasumik nunani ineriartortuni meeqqat atugaannik suliaqartaraluartoq, annilaarput tusaramikku nalunaarusiaqartoq, Nunatsinni meeraqartoq naammattumik nerisassaqarneq ajortunik. Nalunaarusiaq tassaavoq Namminersornerullutik Oqartussat 2007-mi suliassiissutaat ”Sundhed på toppen”, suli nutserneqanngitsoq. Taanna KNR-imi arlaleriarlugu sammineqareerpoq.

Danmarkimi tusagassiortut eqqummaarissut nalunaarusiaq maanna aamma sammilermassuk, Danmarkimi Nunatsinnilu politikerit siulliuniutiinnavilerput piumasaralugu, ajornartorsiut kalaallit pisortaasa aaqqissagaat. Kisianni nalunaarusiaq naammassiinnartoq, meeqqat ilaqutariillu meerartallit atugaannik pitsanngorsaataasinnasunik Inatsisartuni ilaasortat arlallit siunnersuuteqarput. Siunnersuutilli tamakkua Naalakkersuisunit itigartinneqarput. Inatsisartunut ilaasortaq aningaasaqarnermullu maanna naalakkersuisuusoq, Siumumeersoq Per Berthelsen, illua tungiliuttuni Demokraatini suli siulittaasuulluni siunnersuuteqarpoq, issuarparput : ”Isumalioqatigiissitaliamik ilaqutariit meerartallit atugarisaasa pitsanngorsaavigineqarnissaannut tigussaasunik siunnersuusiortussamik pilersitsinissamut Naalakkersuisut peqquneqarnissaannik Inatsisartuni aalajangiiffigissallugu siunnersuut.”, issuaaneq naavoq. Ilaqutariit toqqissisimanerat pillugu Naalakkersuisut nuna tamakkerlugu suli misissuisoqarnera innersuussutigalugu siunnersuut Naalakkersuisut itigartippaat. Illua tungiliuttuneersut, tassa Inuit Ataqatigiinniit, Demokraatiniit Kattusseqatigiit Partiiatalu ilaasortaatitaa isumalioqatigiissitaliornissamik pilersitseqqusillutik siunnersuusioqatigiipput, meeqqat akornanni piitsuussusermik atugaqartitsineq akiorniarlugu nuna tamakkerlugu piaarnerpaamik iliuusissanut pilersaarusiortussanik.

Kisianni siunnersuut aamma taanna Naalakkersuisunit itigartinneqarpoq, ilaatigut ilaqutariit meerartallit atugaannik pitsaanerulersitsinissamut 8 millioner koruuninik aningaasaliisimanertik tunngavilersuutigalugu.

Meeqqat pisinnaatitaaffii pillugit Naalagaaffiit Peqatigiit isumaqatigiissutaata meeqqat atuarfianni pinngitsoorani atuartitsissutaasussanut ilaanngunneqarnissaa pillugu Siumup inatsisartuni ilaasortaatitaasa siunnersuutigigaluarpaat, Naalakkersuisunilli aamma itigartitsissutigineqarluni.