Meeqqat atugaat inatsisartuni oqallisigineqangaatsiassapput

Inatsisartut upernaakkut ataatsimiinneranni ullut ataatsimiiffiusut ullumi sisamassaat, meeqqat atuartut assigiinngitsutigut atugaannik imaqangaatsiassaaq.

Meeqqat atuarfiat pillugu Inatsisartut peqqussutaata allanngortinneqarnissaannik siunnersuutip siullermeerlugu oqallisigineqarnerata saniatigut, meeqqat atuarfiannut tunngatillugu allanik siunnersuutinik Inatsisartut ullumi oqaluuserinnissapput.

Inatsisartuni ilaasortap Demokraatineersup, Astrid Fleischer Rexip, siunnersuutaa, tassalu illoqarfinni tamani sillimmatitaasartunik, meeqqat atuartut tatigalugit saaffigisinnaasaannik arlalinnik atorfinitsitsisoqarnissaa pillugu siunnersuutaa, Inatsisartuni ullumi siullermeerlugu oqaluuserineqassaaq.

Aamma Siumut sinnerlugu Inatsisartuni ilaasortap Doris Jakobsenip, Ilinniartitaanermut aamma naalakkersuisuusimasup, siunnersuutaa; tuluttut oqaatsinik ilinniartitsinerup 2. klassimiit, tassa qallunaatut ilinniartitsinerup aallartiffianitulli ilinniartitsissutigineqartalernissaanik siunnersuutaa, ullumi aamma oqaluuserisassaniippoq.

Taakku saniatigut nunatsinni atuarfitsialammi meeqqanut atuartunut nerisaqartitsisalernissap, siornagut aamma qaqinneqartarsimasup, naalakkersuisooqatigiillu aamma isumaqatigiissutaanni ilanngunneqarsimasup, qularnaatsumik aningaasalersorneqarnissaanut naalakkersuisut suliakkerneqarnissaannik Demokraatineersup Jens B. Frederiksenip siunnersuutaa, Inatsisartuni siullermeerlugu ullumi aamma oqaluuserineqassaaq.