Meeqqat atuarfiini eqaarsaartitsisarnerit aaqqissugaanerunissaat ujartorpaat

Atuartut pualavallaartut ilinniakkaminnik aallussinngitsut, susassaaleqinerullu kingunerisaanik pinerluttut. Tassa meeqqat atuarfiini timersornerup aaqqissuulluagaannginnerata kingunerisinnaasai. Ilisimatooq Katuami ataatsimiinnermi peqataasoq Christina Warrer Schnohr ima oqarpoq:

- Atuartut aalarpiarneq ajortut atuarnerminnik iluamik aallussisinnaaneq ajorput, ilinniakkatillu amerlasuutigut puiguinnartarlugit, Christina Schnohr oqarpoq.

Atuartut sapaatip-akunneranut akunnerni marlunni eqaarsaartinneqakkajuttarput. Eqaarsaartitsisarneq atuartitsissutitut namminersortutut inissisimanngilaq, atuarfiillu ataasiakkaat eqaarsaartitsisarnitik tamaasa qaammammut ataatsimut inississinnaavaat ukiullu sinnerani eqaarsaartitsisoqartarani.

Eqaarsaartitsisarneq aamma pingaartinneqarneq ajorpoq, ilinniartitsisullu eqaarsaartitsinissamut immikkut ilinniarsimasuusaratik.

Meeqqat arsamik tuniinnariarlugit eqaarsaartarfimmut aamma isaatiinnarneqartartut ilaatigut oqaatigineqarpoq.

Isumasioqatigiinnermi peqataasut unammilligassat pillugit saqqummiussinerminni ilaatigut taama oqarput.

Atuarfinni timersortitsisarnerit aaqqissugaaneruleraluarpata, assersuutigalugu peqqinnissaqarfimmut aningaasartuutit ikilisarneqarsinnaasut, Katuami isumasioqatigiinnermi aaqqissuisoq Kim Godtfredsen oqarpoq, nangillunilu:

- Atuarfinni timersortitsisarneq ukiorpassuarni ineriartortinneqanngisaannarsimavoq, saniatigullu oqalulluta meerartavut peqqiilliligaluttuinartut, tigussaasumillu iliuuseqarata. Taamaammat atuarfinni timersornerup ineriartortinneqarniissaa anguniarlugu isumasioqatigiittoqarpoq,

Meeqqat atuarfiini annertunerusumik timersortoqartalernissaa pillugu isumasioqatigiissitsinermik aaqqissuisoq Kim Godtfredsen oqarpoq.