Meeqqat atuarfiini atuartut kaammattuisortaassapput
Meeraq qiimmassarnissaa kaammattornissaalu suliassarissavai, Ilaqutariinnermut Kultureqarnermullu Naalakkersuisoqarfimmi, Immikkut Siunnersorti Else Marie Thorin oqarpoq:
- Kaammattuisup suliassarivai, meeraq qiimmassassallugu kaammattussallugu. Immaqa meeraq atuarfimmut nerisassaminik taquarsimanngilaq, immaqa eqqiluisaarpallaanngilaq, taava tamakkunatigut kaammattuisup ikiorsinnaavaa angajoqqaat peqatigalugit.
Ilaqutariinnermut Kultureqarnermullu Naalakkersuisoqarfimmiit 2010-mi aalajangerneqarpoq, nalunaarusiami 2008-mi suliarineqartumi taaguutilimmi "Kalallit Nunaanni Meeqqat" oqaatigineqartutut, atuarfimmi kaammattorteqalissasoq.
Tassani allassimavoq, nunatsinni meeqqat amerlanersaat pitsaasumik ingerlalluartumillu inuuneqartut, nalilerneqarsimallutillu meeqqat ikinnerusut - niviarsiaqqat 15 procentii nukappiaqqallu 24 procentii - ilungersunartunik ajornartorsiuteqartut.
Taamaammat kaammattorteqartarnerup eqqunnissaa 2008-miit sulissutigineqalerpoq. Atuarfimmilu kaammattortiusoq ilinniarsimassaaq, ilinniarsimasumillu pissarsisoqarsinnaanngippat meeqqanut inuusuttunullu ilisimannittuusariaqarpoq:
- Kaammattuisoq ilinniagaqartuusinnaavoq, inulerisutut, ilinniartitsisutut, perorsaaasutut, isumaginninnermut ikiortitut allatulluunniit. Kisianni Nunarput tamaat qiviassagutsigu, nalunngilarput ilinniarsimasunik amigaateqartarluta. Taamaattumik kissaatiginarpoq kaammattuisartutut sulisussaq meeqqanik inuusuttuaqqanillu ilisimaqarluartuussasoq, Else Marie Thorin oqarpoq.
Nalunaarusiami "Kalaallit Nunaanni Meeqqat" saqqummiunneqarpoq, meeqqat inuusuttullu inersimasumik tapersersortigisinnaasaminnik ilitsersortigisinnaasaminnillu pisariaqartitsisut. Kaammattortiusussarli atuarfinni ulluinnarni qanimut inissisimassalluni. Meeqqallu kikkut kaammattorteqartassanersut, assigiinngitsunit aalajangersorneqartassapput:
- Kaammattuisoq taanna nammineerluni malussarniartuussooq meeqqat pisariaqartitsinersut. Imaassinnaavoq aamma ilinniartitsisoqataasut taavalu klasselæri saaffiginnittoq kaammattuisumut, meeqqamik pisariaqartitsisumik malussarsimaguni. Tassa qanimut suleqatigiinneq pisariaqassooq tassani, Else Marie Thorin nassuiaavoq.
Misiliinermi siunertaavoq, meeqqat atugarliortut atuakkerinermut, soqutigisalerinissamut meeraanissaminnullu piffissaqanngitsut atuarfimmi kaammattorteqarnermikkut tapersersorneqarnissaat isumassorneqarnissaallu qularnaarnissaa. Misiliutip ingerlalluarnissaa, Ilaqutariinnermut Kultureqarnermullu pisortaqarfimmiit neriuutigineqarpoq:
- Tassa 2014-ip tungaanut neriuutigaarput una misiliutitut aallartitarput aningaasaliiffigisarpullu tigulluarneqarumaartoq atorluarneqarlunilu, Ilaqutariinnermut Kultureqarnermullu Naalakkersuisoqarfimmi Immikkut Siunnersorti Else Marie Thorin naggasiivoq.
