Meeqqat atuarfiini angusanik paasissutissiivik

Meeqqat atuarfianni inaarutaasumik misilitsinnerit, ukiuni sisamani kingullerneersut, Inerisaaviup Internettikkut nittartagaani, paasissutissiisarfikkut takuneqarsinnaasunngorlugit, Inerisaaviup Ilisimatusarnermut Naliliisarnermullu immikkoortortaqarfiata saqqummerseqqammerpai.

Inerisaavimmit neriuutigineqarpoq, ilinniartitsisut, atuarfinnilu siulersuisut, siumut isigisumik meeqqat angusaannik pitsanngorsaaniarnerminni, paasissutissanik nalunaarsuivik atorluassagaat.

- Neriutigaarput soorunami, inerisaanermut atorneqassasoq. Karakterit ajunnginnersut imaluunniit ajornersut pivallaanngikkaluarlugu, qanoq sutigullu atuarfinni pitsanngorsaasinnaanermut atorneqassasoq neriuutigaarput. Aamma illoqarfiit akunnerminni suleqatigiinnissaminnut sakkussatut atorsinnaagaat, Inerisaavimimmi Ilisimatusarnermut Naliliisarnermullu immikkoortortami pisortaq Kaali Olsen oqarpoq.

Paasissutissanik nalunaarsuivik, ukiut kingulliit marluk ineriartortinneqarsimavoq.

Internettimi nittartakkamut www.p-center.gl –imut iseraanni ”Atuarfimmi angusat” iserfigineqassaaq.