Meeqqat atuarfiat nalilersoqqissaarneqaqqinnialerpoq

Meeqqat atuarfiata nalilersorneqartarneri ingerlanneqartareersut, politikkikkut toqqammaveqarpallaartinneqannginnissaat pinaveersaarniarlugu, arlaannaannulluunniit attuumassuteqanngitsunit tamanna suliarineqassasoq, Ilinniartitsisut kattuffiata IMAK-ip, Kommunit kattuffissuata KANUKOKA-p Naalakkersuisullu ataatsimoorullugu maanna aalajangiuteqqammerpaat.

- Assersuutigiinnarlugu atuarfinnut sinaakkutat, inatsisit, Nunatsinnut tulluuttuunersut IMAK-ip misissortikkusuppai. Taava uagut Naalakkersuisuni misissortikkusutatta ilagivaat atuarfiit pisoqalisimaqisut, inatsimmik ullumikkumut tulluutinngitsumik toqqammaveqartut, taakkua qanoq sunniuteqarpat? Nick Nielsen aperivoq.

Ilinniartitaanermut naalakkersuisup kattuffiillu suleqatigiillutik misissortitassaasa ilagaat, meeqqat atuartut taakkulu angajoqqaavisa atuarfinnut qanoq isumaqarnersut paasiniarneqarnissaat.

- Tassami takusinnaajuaannarparput angajoqqaat meeqqaminnik tapersersuigunik angajoqqaat meeqqaminnut toqqissisimanartumi angerlarsimaffeqartitsigunik, meeqqat ilinniarnerminni patajaatsumik inissisimasarput. Taamaattumik taassuma nukittorsarneqarnissaa Naalakkersuisuni sukumiisumik aamma anguniarparput, Ilinniartitaanermut Naalakkersuisoq oqarpoq.

Angajoqqaat meeqqallu atuarfiinut attuumassuteqartut allat, soorlu ilinniartitsisut isumasiorneqarnissaannik, Naalakkersuisut suliniutaat, Nuummi aprilip 25-anni pisussaagaluartoq taamaatiinnarneqarpoq, soqutiginnittut ikippallaarneri tamassumunnga pissutaalluni.

Ilinniartitaanermut naalakkersuisoq aperaara, meeqqat atuarfiat pillugu suliniummut soqutiginninneq taama annikitsigereersoq takusinnaallugu, angajoqqaat allallu attuumassuteqartut soqutiginnilersinneqarnissaat Naalakkersuisunit qanoq anguniarneqarnersoq, Nick Nielsen tamanna pillugu ima akivoq.

- Angajoqqaat meeqqat atuarfiannut attuumassuteqarnerat sukumiisumik aaqqissuusaasumik inerisarneqarluni suliniutigineqarnikuunngilaq. Taanna nassuerutigisariaqarparput aamma. Kisianni inatsisit, taavalu aamma meeqqat atuarfiannik aaqqissuusseqqinnerit assigiinngitsut ingerlasimapput. Isumaqarpunga massakkut piffissanngortoq aaqqissuutissallugu nukittorsassallugulu, eqqumaffigissallugulu angajoqqaat annerusumik akuunerulersinneqarnissaat meeqqat atuarfiat eqqarsaatigalugu, taamaattumik sukumiisumik suliniutigivarput, Ilinniartitaanermut naalakkersuisoq, Nick Nielsen oqarpoq.

Ilinniartitaanermut pilersaarummi II-mi (2-mi) suliniutissatut pilersaarutaapput, meeqqat atuarfiata nalilersorneqarnerata saniatigut makkuusut:
Pitsaassusilimmik atuarfiup ineriartortinneqarnera, ilinniartitaaneq piginnaanngorsaqqittarnerillu, ilinniartitsisunngorniartarnerup pitsanngorsaqqinneqarnissaa, atuarfiit illutaasa qanoq pitsaassuseqarnerannik nalunaarusiornissaq, immikkut atuartitsineq peqataatitsinerlu taamatullu Inerisaaviup suliassaanik nutaamik aaqqissuusseqqinneq.