Meeqqat atuarfiat ernumagaat
–Pingaaruteqarluinnarpoq tulleriiaarinerni meeqqat atuarfinnik salliutitsineq ingerlalluartunngortitsinerlu. Ilinniartitsisuuneq pilerinarsartariaqarpoq, tassami nuna nutaatut ingerlaarfiusoq ingerlaavartumik ilinniartitsisussaaleqisussaanngilaq, Henrik Leth, Sulisitsisut pisortaat oqarpoq.
Nalunaaruteqarneq saqqummerpoq Sulisitsisut sulisut amigaataasut pillugit misissuinerata saqqummiuneranut atatillugu, misissuinermi erserpoq Kalaallit Nunaanni inuit 800 missaaniittut namminersortuni amigaatigineqartut.
-Inuussutissarsiornermut inuiaqatigiinnullu pingaaruteqarluinnarpoq meeqqat atuarfiata ilinniarluarsimasunik naammassisitsisarnissaa, taakkumi inuusuttut piareersarluarsimasut ilinniaqqinnissaminnut piareersarsimasuussapput inuussutissarsiutitigullu ineriartornermut isiginnaaginnartutut inissinnatik.
Ukiorpaalunnik pikkunaqisumillu ingerlaarnermik akeqassaaq, ingammik ullumi takusinnaareerlugu, ilinniarsimasunik sulisunik amigaateqarnerput, tassami amigaatigineqartut amerlaqatigaat ukiuni marlunni meeqqat atuarfiannit naammassisut, Henrik Leth oqarpoq.
Sulisitsisut Kalaallit Nunaanni suliffissuaqarfittut ineriartorneq naammagisimaarpaat, naalakkersuinikkulli suliaqartut siumut isiginiarsimannginnerat piareersimaniarsimannginnerallu ajoralugu, ingammik inuusuttorpassuit inuussutissarsiutitigut inuunermut ikaarsaariartorfiata nalaani Kalaallillu Nunaata inuerukkiartuinnarnerata nalaani.
