Meeqqat atuarfianni ilinniartitsisut ilinniarsimasut amerlanerulersut

Nunatsinni kommunit avannarlersaanni pingasuni ilinniartitsisut ilinniarsimasut amerlanerupput, Kommune Kujallermilu iliniartitsisut 1,3%-inik ikileriarsimallutik. Tamaat isigissagaanni nunaqarfiit mikinerusut ajorneruisumik inississimapput Nuummilu inissisimalluartoqarluni.

-Kommune Kujallermi suliunnaartut sulilersunit amerlanerusimapput. Piffissaq sulinermut atorneqartoq pillugu IMAK-imut isumaqatigiissuteqartoqarsimagaluartoq, atorfiit inuttalersornissaat ajornakusoortissimavarput. Qujanartumilli nunatsinni kommunini allani assinganik ajornartorsiuteqanngilagut, Kanukokami siunnersortaaneq Simon Lennert knr.gl-imut oqarpoq.

Aatsaat taama amerlatigisunik ilinniartitsisunik naammassisoqartaraluartoq, nunatsinni ilinniartitsisutut atorfiit inuttaqanngitsut ilinniartitsisunik kalaallinik ilinniarsimasunik inuttalersornissaat ajornakusoortupilussuussaaq. Pingaartumik nunaqarfinni atorfiit, kitaani tunumilu, inuttalersorniarnissaat ajornakusoortupilussuussaaq. Tamannalu meeqqanut nunaqarfinni pineqartuni najugaqartunut ajuusaarnarpoq, ilinniaqqinnissaammi taamaasilluni nunatsinni illoqarfinni anginerni peqatigisaannik annikinnerusumik siunissamut qulakkeerneqarsimassammat.

-Nunaqarfinni mikinerusuni atorfiit inuttalerniarnissaat ajornakusoortittupilussuarput, kisianni ilinniartitsisunik angalasunik pilersitsinikuuvugut, taakkulu nunaqarfinnut angalasarput faginilu immikkut toqqakkani ilinniartitsisarlutik. Kommuneqarfik Sermersuumi tamanna angusaqarfiulluarsimavoq, aamma Uummannami taamatut suliniuteqartoqarnissaa sulissutigineqarpoq. Kiisalu aamma Qaasuitsup Kommuniani ungasissumit ilinniartitsineq misileraatigineqarpoq, tassanilu atuartut internet atorlugu ilinniartinneqassapput ilinniartitsisunit akulikitsumik tikeraarneqartarlutik. Tamanna aamma isumalluarfigisupilussuuarput, Simon Lennert nassuiaavoq.