VIDEO Meeqqat atuarfianni atuartitsinerup pitsassusaa angajoqqaat apeqquseraat

- Ilinniartitsisut fagini assigiinngitsuni ajoraluartumik amigartorujussuarmik tunniussisarsimapput, taavalu oqaloqatigisussaagaluarlugit peqataanngisaannarlutik, angajoqqaat ilaat, Tage Lennert, KNR-imut taama oqarpoq.

Ajornartorsiutillu tamakku uninngatiinnarneqarneri aamma naammagineqanngilaq:

- Pitsanngorsaatissanik ilinniartitsisut aammalu kommunalbestyrelsip tungaaninnaannit qanoq iliortoqartanngimmat uagut taamaattoqarnera isiginngitsuusaarsinnaannginnatsigu angajoqqaajusugut qisuariaateqarpugut, Tage Lennert oqarpoq.

Ajornartorsiortoqarnera nassuerutigaat

Ilinniartitsisut oqartussallu allat peqatigalugit angajoqqaat ippassaani ataatsimiisitsipput, ajornartorsiortoqarneralu aamma nassuerutigineqarpoq.

- Pissutsit soorunami erloqinartorujussuusinnaapput, Minngortuunnguup Atuarfiata pisortaa, Nivi Heilmann Efraimsen, taama oqarpoq. Taamaattumillu atuarfiup pisortaata angajoqqaat qisuariarnerat qujaruppaa.

- Anguniagassat anguniakkallu innuttaasunut siammartissavagut. Sunaana atuarfiup pisariaqartikkaa, angajoqqaat atuartuuteqassagunik suut pisinnaassavaat?, Nivi Heilmann Efraimsen KNR-imut oqarpoq.

Ilorraap tungaanut ingerlasoqarpoq

Atuarfiillu ingerlanerlunnerat qangali ilisimaneqarpoq, ilorraallu tungaanut ingerlasoqaraluarluni.

- 2010-mi atuarfitta ingerlalluannginnerat paasigatsigu, iliuutsit assigiinngitsut ingerlannikuuagut Qeqqata Kommunianit. Taakkualu iliuutsit kinguneqarput angusat pitsanngoriartornerannik. Soorunami suli pitsanngorsaajuaannartassaagut, aamma angusat suli pitsaanerusinnaammata, Evelyn Frederiksen (S), Qeqqata Kommuniani ilinniartitaanermut ataatsimiititaliami ilaasortaq, KNR-imut taama oqarpoq.

Pitsanngorsaaniartoqarneralu angajoqqaanit nuannaarutigineqarpoq, ataatsimiinnermilu apuukkusutat aamma apuunneqarlutik.

Ataatsimiinneq pissarsiffiulluartoq

- Pitsaasussaq meeqqatsinnut ujartorusupparput, pitsaasumik atuartinneqarnissaat angorusoqaarput. Aamma ilinniartitsisunik pikkorissunik, aalajaatsunik suliffimminnullu tunniusimasunik ippassaq oqallinnitsinni assorujussuaq eqqartuivugut, Tage Lennert oqarpoq.

Ilinniartitsisulli kisiisa pisuutinneqarsinnaanngillat, angajoqqaammi aamma akisussaaffeqarput.

- Kinguneqartitsisarneq annikippallaarsorivara. Meeqqat atuarfimmi qanorluunniit pissusilersorsinnaasartut ilaanni takusarpagut. Tamannalu ilinniartitsisut soorunami peqanngikulanerannut aamma pissutaasinnaasarpoq, Nivi Heilmann Efraimsen taama isumaqarpoq.

Taamaammallu angajoqqaat suleqataassuseqarnerat iluarisimaarneqarpoq:

- Angajoqqaat eqeersimaartut periusaat qanortoq aamma siammarterli angusassaq pitsaanerpaaq tamatsinniinniassammat, Evelyn Frederiksen oqarpoq.

Tamannalu meeqqat eqqarsaatigalugit angajoqqaamit isumaqatigilluarneqarpoq:

- Meeqqatta siunissaat pitsaasuussappat, qanoq iliunngikkutta allatulli atuarsinnaanngitsutut ukioq atuarfiusoq naassammassuk, Tage Lennert oqarpoq.

Ajornartorsiortoqarnera eqqumaffigineqarpoq

- Siullermik assorujussuaq qujamasuppunga angajoqqaat taamannak qisuariarnerannut, takutiinnarpaa eqeersimaassuseq angajoqqaat akornanni aamma piusoq.

- Suleriarnissaq tullinnguuppoq. Aamma oqaatigisariaqarpara meeqqat atuarfiat tassaammat inuiaqatigiit siumut aallariarnissamut aqqutissaalluartoq, Ilinniartitaanermut naalakkersuisoq, Nivi Olsen (D), KNR-imut taama oqarpoq.

Ilinniartitaanermut naalakkersuisup meeqqat atuarfianni ajornartorsiortoqarnera ilisimaneqartoq aammalu misissuiffigineqartoq oqaatigaa, tamannalu pingasoqiusamik avinneqarsinnaasoq oqaatigalugu: Atuarfiup pisortai, ilinniartitsisut angajoqqaallu. Taakkulu annertuumik nukittorsaaviginiarneqarput:

- Iliuusissarput massakkut suliarivarput, aamma nalunaarusiortoqartoq ilisimaneqarpoq, taannalu allaqqissaarneqarluni sapaatit-akunnerata tulliani saqqummiunneqassaaq. Taava tassanngaanniit iliuusissat tulleriiaarlugit suliarivagut pingaarnersiuilluta, Nivi Olsen oqarpoq.

Ilinniartitsisut sulinngittuukulanerat ajornartorsiutaasoq aamma eqqaaneqarpoq, taakkununnga aamma ilissi akuliutissamaarpisi iliuuseqarlusi?

- Soorunami atuarfinnut ataasiakkaanut akuliussuutissanngilagut, kisianni takutissuarput sumut ingerlaniarnerluta ersarittorujummik paatsoorneqarsinnaanngitsumik. Taava uanga akisussaaffigissavara naggaterpiaani ilinniartitaanerup qanoq siuarsarneqarnissaa.

- Kommunalbestyrelsit piaartumik taavalu pimoorullugu suleqatigisariaqalerpagut, siunissamut akissaaruppugut meeqqat atuarfiannik isiginngitsuuinissatsinnut, Ilinniartitaanermut naalakkersuisoq, Nivi Olsen (D), taama naggasiivoq.