Meeqqat Atuagaateqarfianni atuffassisoqarlunilu atuakkiorneq sammineqassaaq

Nuummi Meeqqat Atuagaateqarfiat aqagu sisamanngornermi qallunaanik atuakkiortunik pingasunik pulaartoqassaaq. Atuartut klassikkaarlutik takkuttut atuffanneqassapput inuusuttuaqqallu atuakkiornermik soqutiginnittut sammisaqartinneqassallutik. Taamaasillutik allannermut unammisitsinermut Allattamut akuunissamut sakkussalersorneqassapput.
septembarip 12-at 2012 11:51

Qallunaat atuakkiortut pingasut tikeraartussat tassapput Ronnie Andersen, L G Jensen aamma Peter Grønlund. Taakku atuakkiortutut sulinertik oqaluttuarissavaat, atuffassissallutik kiisalu oqaluttuap allannerata aaqqiissuuttarnera oqaluttuarissallugu.

- Nukappiaqqat niviarsiaqqallu atuakkanik atorniartarfimmik atueriaasiat assigiinngitsorujussuuvoq. Niviarsiaqqat atuakkanik atortarput angerlaallugillu. Nukappiaqqat playstation imaluunnit qarasaasiaq atoriartorlugu maaniittarput. Nukappiaqqat atuakkanut saatikkusuppagut tamannalu pissutigalugu atuakkiortut pingasut nukappiaqqanik samminerusunik atuakkiortartut qaaqqusimavagut. Taamaasiornikkut nukappiaqqat atuarnermik allannermillu soqutiginnilersinnissaat anguniarparput. Atuakkatigut sammineqarsinnaasut ilagaat skate-rneq, cykkilerluni alutornartuliorneq, graffitiliorneq ajortuliulaarnerluunniit. Sammisaqartitsinissamut qilanaarpunga, tassanilu allannialerlaanut allattareersunullu isummanik nutaanik pissarsiassaqarmat, meeqqat atuagaateqarfianni ningiu Mette Laustsen oqarpoq.

Atuakkiortut taakku pingasut inuusuttut silarsuaat samminerusarpaat tamannalu atuakkanit allaanerusumik imaqarsinnaasarpoq. Taamaammat allaanerusumik atuakkiornerup silarsuani suleriaaseqarnertik pissutigalugu nukiappiaqqanut atuarnermik soqutigisaqarpianngitsunut soqutiginaateqarsinnaasumik atuffassissutissaqarput

- Inuusuttunut atuakkiani angutit aallaavigalugit allatat akuttupput, atuakkiortulli aqagu pulaartussat nukappiaqqanut tunngasunik allattarput. Oqaatsit poortunngikkaluarlugit ulluinnarni inuuneq sammineqarpoq aammalu kulturit saqqumivallaanngikkaluit inuiaqatigiinnit avissaarsimanerulaartut nukappiaqqat akuuffigisagaat sammineqarput. Qularinngilara Ronnie Andersen,  L G Jensen aamma Peter Grønlund nukappiaqqat atuakkanut soqutinnilernerannut allarniutaasinnaasunik saqqummiussaqarumaartut. Atuakkiornermi sammisaqarnermi nukappiaqqat niviarsiaqqallu peqataasinnaapput taannalu sisamanngornermi ualikkut nalunaaqutaq 16.00 aallartissaaq, Meeqqat Atuagaateqarfiannit Mette Laustsen oqarpoq.