Meeqqat atornerlunneqartut kisimiittutut misigisimassanngillat
Aasianni aatsaat taamatut pisoqalinngilaq. Angut alla meeqqanik inuusuttuaqqanillu 40-ngajannik kinguaassiuutitigut atornerluisimasoq 1996-imi paasineqarmat tamatuma kingorna eqqugaasimasut ikiorserniarlugit suliniutit assigiinngitsut aallartisarneqarput.
Tarnikkut katsorsaasartoq Nukakkuluk Kreutzmann taamani meeqqanik inuusuttuaqqanillu eqqugaasunik katsorsaaqataasoq isumaqarpoq ikiorsiineq piareersarluarneqartariaqartoq.
- Aamma meeqqap atornerlunneqarsimasup ilaqutai ikiorserneqartariaqarput. Tarnikkut ikiorsiineq piffissami sivisuumi ingerlanneqartariaqarpoq, taamaalilluni misigisat sakkortuut iliuuseqarfigineqarniassammata, Nukakkuluk Kreutzmann oqarpoq.
- Meeqqat inuusuttullu paasissavaat, misigisatik kisimiillutik piginagit oqaluuserinissaallu inerteqqutaanngimmat. Ingerlaqqinniassagunimmi misigisapilutik oqaluuserisariaqarpaat.
Aasiaat kommuniat piaartumik angajoqqaanut suleqatigiiffiliussasoq Nukakkuluk Kreutzmannip neriuutigaa. Meeqqat inuusuttullu pissusissamisuunngitsumik pissusilersortut eqqumaffigeqquai, atornerluisoqarsimanermillu pasitsaassinermi piaartumik pisortanut saaffiginneqqusilluni.