Meeqqat atornerlunneqarsimasut illutaartinneqarniarput

-Ataatsimeersuarnermi Reykjavik-imi Barnahusid-imit immikkut ilisimasalinnit, USA-mi meeqqanik sullissiviit 600-nit amerlanerusut nunap iluani kattuffiannit aamma maani Kalaallit Nunaanni immikkut ilisimasalinnit oqallissaarisoqassaaq. Meeqqat illuat pillugu isikkiviit tamaasa aallaavigalugit oqallittoqassaaq, aningaasartuutissanut tunngasut, katsorsaaneq sumi inissisimanissaa qanorlu aaqqissuussaanissaa aammalu pisortatigut immikkoortut allat qanoq suleqatigineqarnissaat, Lise Frederiksen - MI/BB-mi siulittaasuusoq oqaluttuarpoq.

Ataatsimeersuarneq ICYC-p aaqqissuussinerata Katuami marsip qaammataani ingerlanneqartup nanginnerissavaa.

-Ataatsimeersuarnermi siunertarineqartoq tassaavoq Kalaallit Nunaanni unamminartunut atugassarititaasunullu tulluuteqqinnaartumik meeqqat illuannik qanoq ittumik pilersitsisinnaanitsinnut innersuusiornissaq. Taamaattumik tikeraanit avataaneersunit oqallissaarutit nammitsinnik najoqqutassiorluta sulinitsinnut isumassarsiorfittut isigineqassapput. Imaassinnaavoq Kalaallit Nunaanni meeqqat illuat katsorsaaviuinnarani aamma tassaasoq ilisimasanik siammarteriviusoq pinaveersaartitsinermullu immikkoortortaqarfiusoq imaluunniit ilinniagaqarfiusoq. Pineqartoq tassaavoq nukissat pitsaasut ikittuinnaasullu pitsaanerpaamik atorluarneqarnissaat, Line Frederiksen naggasiivoq.

Ataatsimeersuarnerup kingorna immersuutit innersuussutillu tamarmik nalunaarusianngorlugit katersorneqassapput taavalu, aningaasat katersorneqarsimasinnaasut ilanngullugit Isumaginninnermut aamma Peqqissutsimut Naalakkersuisumut tunniunneqassallutik.

Meeqqat Inuunerissut ataatsimeersuartitsinissaat Nuummi Katuami 9.-10. septembarimi pissaaq.