Meeqqat atisarsineranniit immiaararserusunnerupput

Sineriammi politeeqarfiit nalunaarput sapaatip akunnerat naanera ukiormanna ulapaarfiunerpaat ilagisimagaat. Erngunnerujussuarlu sisamanngormat aallartereerpoq qaammammusisoqarmat. Taassumalu qaavatigut akileraarutinit utertoorutit 150 millioner koruunit tunniunneqarput. Aningaasat taama amerlatigisut tunniunneqarnerisa kinguneranik ernguttoqangaatsiarpoq.

- Tupigusuutiginngitsuugassaanngilaq sooq inuit immiaararserusunnerunersut meeqqat atisassaannut atornagit, Qeqertarsuup tunuani politiit pisortaat Karl Vinther oqarpoq.

Tassungalu assigusumik kujataani politiit nalunaarput.

- Assorujussuaq takorusukkaluarpara aningaasat taama amerlatigisut tunniunneranni aningaasat qassit imigassamut qassillu meeqqanut atorneqarsimanersut. Piffissami kingullermi politiini suliaqartarpugut inunnik isumaginnittoqarfiup ilanngunneqartariaqarneranik nassataqartunik, kujataaani politiit pisortaat Bent Ole Kleist oqarpoq.

Pissutsit qeqqani aamma taamaassimapput.

- Sapaatip akunnerata naanerani ernguttoqaqaaq. Angerlarsimaffinni eqqissiviilliornerit arlallit orniguffigisariaqarsimavagut, Sisimiuni politiinit Karl Jørgen Lennert oqarpoq.