Meeqqat ataatsimeersuarnerat aallarteruttorpoq
Silap pissusaanut tunngatillugu meeqqat Nunatsinnit aallartitaasut, Ivalu, Kathrine aamma Lillian Aasianneersut ulluni makkunani sininnissaminnut piffissaqanngingajavipput. Aaqqissuussineq ullaarnganiit unnussuarmut ingerlanneqartartoq, silap pissusaanut aallartitat inuusuttut taakku oqarpoq.
- Aamma paasisatta Nunatsinni meeqqanut allanut inuusuttunullu qanoq ingerlateqqissanerlugit paasivarput. Aamma silap pissusaanut aallartitanut Europameersunut, Afrikameersunut Asiameersunullu attaveqarlualerpugut.
- Inuusuttut uagut ataatsimoornissarput pisariaqartipparput, taamaalilluta inersimasut silap pissusaata allanngoriartorneranut piviusunik iliuuseqarsinnaanissaannik kingusinaartinnata sunnersinnaaniassagatsigik, Ivalu Københavnimi meeqqat ataatsimeersuarneranni peqataasoq oqarpoq.
Silap pissusaa pillugu aallartitat taakku meeqqat allat nunanit ukunaneersut attaveqarfigisimavaat: Kina, Korea, Hong Kong, Zambia, Maldiverne, Tajiskistan aamma Tyskland.
Tallimanngorpat pisussaq Ivalup qilanaarinerarpaa, tassa Meeqqat silap pissusaa pillugu Ataatsimeersuarnerannit innersuussutit, Connie Hedegaardimut tunniunneqartussaammata, taamaalillutik COP 15-imi ilanngunneqarsinnaaniassammata.