Meeqqat ataatsimeersuareerlutik naalakkersuisunut borgmesterinullu saqqummiisut
Meeqqat apriilip ulluisa 11-aniit 12-ata tungaanut Nuummi ataatsimeersuareerlutik naalakkersuisunut nunatta borgmesteriivinullu innersuussutinik arlalinnik tunniussipput.
Ataatsimeersuarneq meeqqanit inuusuttunillu 25-nit, 13-it 17-inillu akornganni ukiulinnit, peqataaffigineqarpoq. Ataatsimoorlutik nunap aqutsisuinut innersuussutinik arlalinnik suliaqarput, ukioq manna qulequtaq "Iliuuseqarneq meeqqanut inuusuttunullu iluaqutaasussaq" ukkataraat.
Ataatsimiinneq, UNICEF Kalaallit Nunaata meeqqat inuusuttullu pisinnaatitaaffiinik pitsanngorsaanermik aamma nunatsinni meeqqanut inuusuttunullu sunniuteqarluarnissamik suliniuteqartoq, NAKUUSA aqqutigalugu aaqqissuussaavoq.
Sapaatit akunnerata kingullermi sisamanngornermi meeqqat inuusuttullu sammisanik tallimanik Nuuk-mi Hans Egedep Illuani saqqummiussipput.
Meeqqat inuusuttullu qulequttat tallimat; ullut tamaasa toqqissisimarusuppugut, ikioqqugutta ikiorneqartussaavugut, ataatsimuussaagut nuannersumik, toqqissisimassagutta iliuuseqartoqartussaavoq aamma imminut ikiorit saqqummiuppaat.
Lykke Andreassen, 16-inik ukiulik, Sisimiuneersoq pingajussaa meeqqat ataatsimeersuarneranni peqataavoq. Ataatsimiinnerlu iluatsilluartutut nalilerpaa.
-Pissarsiaqarnarpoq soorunami ilikkagaqarnarlunilu, soorlu, qanoruna imminut ajunngitsumik isigilersinnaasunga.
Meeqqat allat ikiorusukkaat
Naalakkersuisunut borgmesterinullu saqqummiussinerup siunertaraa takutissallugu meeqqat inuusuttullu sumi iliuuseqarnissamik pisariaqartitsinersut, aammalu sumi ataatsimoorluni akisussaaffeqarnissaq kiisalu ersarissunik iliuuseqartoqarnissaq pisariaqartinneqartoq.
Lykke Andreassenip Naalakkersuisunut borgmesterinullu saqqummiussinertik tigulluarneqarumaartoq iliuuseqarfigineqarumaartorlu neriuutigaa.
-Eqqartornikuuarput uagut ingerlateqqissagigut, suliagut meeqqanut allanut sunniuteqarniassammata.
Saqqummeereernerup kingorna Meeqqat Isummersorfiini ilaasortat, Naalakkersuisut kommunimilu borgmesterit aalajangersagaq atsiortarpaat, tassanilu inassuteqaatit malinnissaannut pisussaaffeqalerput.
Aalajangersakkat inassuteqaatillu najukkami kommunini qinikkat ataatsimiinnerini aamma saqqummiunneqassapput.
