Meeqqat arpannerat seqernup qungujuffigaa
Kommuneqarfik Sermersuumi borgmesteri Asii Chemnitz Narup aamma arpannermik aaqqissuisut siuuttuat Kim Godtfredsen ammut kisitsereermata Nunatsinni meeqqat arpannerisa annersaat sisamanngornermi ullaap tungaani aallartippoq.
Meeqqat 2.000-it missaat Nuup qeqqani aqqusineq Kuussuaq atuarlugu aallarput suliniummi Timi Asimi peqataasut siuttuullutik aqqutissamik innersuussisut.
- Meeqqat assorsuaq arpannissaq qilanaarisimavaat pingaartumik pinnatassaqartoq tusaramikku, Ukaliusap atuarfiani 4.a-mi ilinniartitsisoq Peter Nørris Christensen oqarpoq.
Arpanneq aallartinngilaartoq Asii Chemnitz Narup oqaaseqatsiarpoq.
- Takusinnaavara seqernup arpannissaq qungujuffigisimagaa, oqarpoq.
Meeqq assigiinngisitaartunik sukkassuseqarlutik aallarput. Ilaasa silagissuaq atorluarlugu tasiorlutik pisuttuarujoorfigaat allat kamitik arpaatit qasujaassussertillu uuttoraat.
Meeqqat 2 kilometeri arpanneri tamaasa nalunaarsorneqartassapput. Arpanneq naammassippat atuarfiit ataasiakkaat qanoq arpatsigisimasut kisinneqarumaarput.
