Meeqqat aningaasarpassuarnik eqquinissamut periarfissinneqarput

Aningaasarpassuit eqqorneqarnissaanut piumasaqaatit tassuatuaapput erinarsorluarsinnaaneq aamma nipilersuut ilaarlugu qitinneq.

Unammissutigineqartoq tassaavoq erinarsuut Julie Berthelsenimit erinarsorneqartoq Qujanaq -  erinarsuut taanna eqqaaviit illoqarfinni nunaqarfinnilu atorneqarnissaannut paasisitsiniaaneruvoq.

Atuarfiit tamarmik tujuuluaqqanik Qujanaq-mik allassimasunik, cd-mik, erinarsuummik imalimmik aammalu unammititsinissaq pillugu nassuiaammik ulluni makkunani nassiussivigineqarput.

Unammisitsinermut peqataanissamut piumasaqaatit tussaapput:

Erinarsoqatigiittussat amerlasuunik ikittunilluunniit ilaaffigineqartut erinarsuummik tusarnaartitsisussat katersorneqassapput, taakkua videoliaaqqamik immiussissapput taannalu paasititsiniaanerup Qujanaq-p Facebook-ikkut nittartagaanut ikkunneqassalluni.

Taakku akornanni videoliaq pitsaanerpaaq, Facebook-ikkut likes-inik amerlanerpaanik pissarsisoq septembarimi toqqarneqassaaq.

Avatangiisinut pinngortitamullu Naalakkersuisoq Kim Kielsen neriuppoq meeqqat amerlasuut erinarsoqataajumaartut.

- Taamaattumik neriuppunga, Kalaallit Nunaanni pinngortitaq alianaatsoq eqqagassanik takusassaqarfiunngitsoq pillugu videolianik pissanganartunik nuannersunillu takusaqarumaartugut, Kim Kielsen oqarpoq.

Unamminermi atuaqatigiit ajugaasut 10.000 kooruuninik akissarsissapput.   Aningaasat atuaqatigiit ataatsimoorlutik suliaqarnerinut atorneqassapput.