Meeqqat angerlarsimaffittaarnissaat neriuutigineqarpoq
Tasiilami meeqqanut inuusuttuaqqanullu angerlarsimaffimmik nutaamik pisariaqartitsisoqarpoq, ullumikkut atuuttoq Prinsesse Margrethes Børnehjem tupakuluusilinnut sanatoriatut 1957-imili sananeqarsimasoq mikivallaarlunilu pisoqalingaatsiarsimammat.
Meeqqat inuusuttuaqqallu katillugit 20-t tassani maanna najugaqarput, taakku ilaat annertuumik sumiginnagaapput aammali ilaqarput innorluuteqanngikkunik innarluutilinnik. Taamaattumik atugassarititaasut pitsaanerpaanngitsut ulikkaaqqajuaannartorlu, immikkoortortami pædagogi Gerda Fly oqarpoq:
– Meeqqat allatut ajornartumik ineeqqani 10 kvadratmeterinik angitigisuni ilaatigut pingasuusariaqartarput, naak tamarmik immikkut eqqissillutik ineqarusukkaluarlutik pigisaqarlutillu. Taamaattumik nutaamik børnehjemitaarnissarput kissaatiginaqaaq. Gerda Fly nassuiaavoq.
Børnehjemimi aamma ini isersimaartarfittut nalinginnaasutut atsigiinnartoq isersimaartarfiullunilu, neriusarfiullunilu, fjernsynertarfiullunilu sammisassaqartitsiviusarpoq. Nutaamik børnehjemitaarnissamik qinnuteqartoqarsimavoq, Inatsisartullu aningaasanut inatsit aappaagumoortoq ualeru oqaluuserilerpassuk, børnehjemimut 24,2 million koruuninik aningaasaliinissaq ilanngullugu oqaluuserissavaat.